పవన్.. నువ్వు మాట్లాడాల్సిన సమయం ఇదే!

ఆంధ్రప్రదేశ్ కు ప్రత్యేక హోదా కోసం కాంగ్రెస్ నిర్వహించిన ధర్నాలో ఆత్మహత్యాయత్నం చేసిన మునికామకోటి కన్నుమూశాడు. ఆవేశంలో తీసుకున్న నిర్ణయంతో తనపై ఎన్నో ఆశలు పెట్టుకున్న కుటుంబాన్ని అన్యాయం చేసి వెళ్లిపోయాడు. ఆత్మహత్యలకు ప్రభుత్వాలు కదలవన్న సంగతిని గుర్తించలేకపోయాడు మునికోటి. చచ్చి కాదు.. బ్రతికి సాధించాలన్న నిజాన్నితెలుసుకోలేకపోయాడు. మునికోటి ఆత్మహత్యతో ఇప్పుడు హడావుడి చేస్తున్న నేతలు..వారం పదిరోజులవగానే.. అతన్ని, అతని కుటుంబాన్నిమర్చిపోతారు. వాళ్లను టీవీల తెరలపై చూపించడానికి రోజుకో కొత్త అంశం పుట్టుకొస్తూనే ఉంటుంది. ఇప్పుడు మునికోటి కుటుంబానికి ఆర్థిక సాయం చేస్తామంటూ కొంతమంది ముందుకు వచ్చినా.. అది ఎంతవరకూ ఆకుటుంబానికి అందుతుందన్నది తెలుసుకోవడం కష్టమే. అయితే..ఇలాంటి సమయంలో కాస్త విభిన్నంగా స్పందించారు జనసేన అధినేత పవన్ కళ్యాణ్. మునికోటి మృతికి సానుభూతిని తెలియజేస్తూనే, ఇలాంటి పరిస్థితుల్లో స్పెషల్ స్టేటస్ పై ఎలాంటి వ్యాఖ్యలు చేయకుండా తనను తాను నియంత్రించుకుంటున్నట్లు ప్రకటించారు. బాగాన ఉంది. కానీ, ఇలాంటప్పుడే పవన్ లాంటి వ్యక్తులు స్పందించాలి. ఆత్మహత్యలకు ఎవరూ పాల్పడవద్దని.. స్పెషల్ స్టేటస్ కోసం మరో మార్గంలో పోరాడదామంటూ ప్రకటించాలి. అవసరమైతే జనంలోకి వెళ్లాలి. తాను ప్రచారం చేసి, ఓట్లు వేయించినందుకు ప్రధాని మోడీని నిలదీయాలి. ఇవేవీ చేయకుండా కేవలం తనను తాను నియంత్రించుకోవడం వల్ల ఎలాంటి ఉపయోగం ఉండదు. ప్రజలు కూడా దాన్నికోరుకోవడం లేదు. పవన్.. ఇకనైనా నీ పవర్ చూపించు. స్పెషల్ స్టేటస్ పై మోడీని కదిలించు.

Read more...

బాబు సెంటిమెంట్‌ను రగిలిస్తున్నాడా?

ఓటుకు నోటు వ్యవహారం ఊహించని మలుపులు తిరుగుతోంది. ఆడియో టేపులు బయటపడడంతో బాబుపై కేసు నమోదు చేయడంపై తెలంగాణ ప్రభుత్వం సమాలోచనలు జరుపుతోంది. బాబును ఏ వన్ గా చేర్చాలంటూ ఇప్పటికే టీఆర్ఎస్ నేతలు పదేపదే డిమాండ్ చేస్తున్నారు. సరిగ్గా ఈ సమయంలోనే స్టీఫెన్ సన్ తో బాబు జరిపిన ఫోన్ సంభాషణలు బయటకు పొక్కాయి. ఇప్పటికే రేవంత్ రెడ్డి అరెస్ట్ తో బిక్కచచ్చిపోయిన టీడీపీ నేతలను మరింత కుంగదీసింది ఈ వ్యవహారం. దీన్ని ఖండిస్తూ రకరకాల ప్రకటనలు చేసినా.. బాబు ఇమేజ్ డ్యామేజ్ అయ్యిందన్న సంగతి మాత్రం అందరికీ అర్థమయ్యింది.

తెలంగాణలో చంద్రబాబుపై ఎక్కడ కేసులు నమోదవుతాయో అన్న అందోళనతో కొత్త స్కెచ్ ను అమలు చేయడంలో బిజీగా ఉన్నాయి తెలుగుదేశం శ్రేణులు. ఆంధ్రప్రదేశ్్లో ఎక్కడికక్కడ పోలీస్ స్టేషన్లలో ఫిర్యాదులు చేస్తున్నాయి. చంద్రబాబు ప్రతిష్ట దిగజార్చాయంటూ కేసీఆర్ పై కేసులు పెడుతున్నాయి. ఒకవేళ హైదరాబాద్లో చంద్రబాబుపై కేసు నమోదైతే.. ఈ పోలీస్ స్టేషన్లన్నింటి నుంచీ కేసీఆర్ కు నోటీసులు పంపించాలన్నది ఏపీ ప్రభుత్వ పెద్దల వ్యూహంగా కనిపిస్తోంది.

ఎన్నికల సమయంలో నోట్ల పంపిణీ.. ఎమ్మెల్సీ ఎన్నికల్లో ఎమ్మెల్యేల కొనుగోలు వ్యవహారాలు రాష్ట్ర రాజకీయాల్లో ఎప్పటినుంచో తెరవెనుక జరుగుతున్న తతంగమే. ఈ విషయంలో ఆ పార్టీ ఈ పార్టీ అన్న తేడా లేనే లేదు. కాకపోతే.. చంద్రబాబు అండ్ కో ఇప్పుడు రెడ్ హ్యాండెడ్ గా దొరికిపోయింది. అయితే.. ఈ కేసులో బాబు టీమ్ ఎంత హుందాగా ప్రవర్తిస్తే అంత ప్రతిష్ట పెరుగుతుంది. కానీ.. చంద్రబాబుతో సహా టీడీపీ నేతలు చేస్తున్న ప్రకటనలు సెంటిమెంట్ ను రగిలించే దిశగానే సాగుతున్నాయి. గుంటూరు మహాసంకల్పసభలో ఈ విషయాన్ని ప్రస్తావించిన చంద్రబాబు.. ఇది తనపై పెట్టిన కేసు కాదని.. ఐదుకోట్ల ఆంధ్రుల ప్రతినిధిపై పెట్టిన కేసంటూ భావోద్వేగాలను రెచ్చగొట్టే ప్రయత్నం చేశారు. బాబు చేసిన ప్రకటనలతో రెండు పార్టీల వ్యవహారం కాస్తా రెండు రాష్ట్రాల వివాదంగా మారిపోయింది. ఇప్పటివరకూ నీటికోసం, విద్యుత్ కోసం, విద్యావ్యవస్థలో ఆధిపత్యం కోసం కొట్టుకున్న రెండు రాష్ట్రాలు.. ఇప్పుడు ఓటుకు నోటు వ్యవహారంపైనా కయ్యానికి దిగేలా పరిస్థితి దిగజారింది.

Read more...

కేసీఆర్ కన్నా ఓమెట్టు ఎక్కువే అంటున్న చంద్రబాబు

పరిపాలనలో, నిర్ణయాల్లో తెలంగాణ ముఖ్యంత్రి కేసీఆర్ కు, ఆంధ్రప్రదేశ్ ముఖ్యమంత్రికీ మధ్య కోల్డ్ వార్ నడుస్తోంది. ఒకరిని మించి మరొకరు కొత్త కొత్త నిర్ణయాలు తీసుకుంటూ దూసుకెళుతున్నారు. ఏపీలో ఎన్టీఆర్ సుజల పథకం మొదలుపెడితే.. తెలంగాణలో ఏకంగా వాటర్ గ్రిడ్ కే రూపకల్పన చేశారు కేసీఆర్. ఏపీలో నదుల అనుసంధానంపై కసరత్తు జరుగుతుంటే.. తెలంగాణలో చెరువుల పునరుద్ధరణకు పనులు మొదలవుతున్నాయి. రైతురుణమాఫీ విషయంలోనూ రెండు ప్రభుత్వాలూ ఒకే తరహా నిర్ణయాలు తీసుకుంటున్నాయి. ఈ వార్ తాజాగా హెలికాప్టర్ల వరకూ వచ్చింది. కొత్త హెలికాప్టర్ను కొనుగోలు చేయాలని కేసీఆర్ నిర్ణయం తీసుకున్న మరుసటి రోజే చంద్రబాబు కూడా అలాంటి నిర్ణయమే తీసుకున్నారు. అయితే.. కేవలం హెలికాప్టర్ తోనే ఆగిపోకుండా, ఓ చిన్న సైజ్ విమానాన్ని కూడా కొనుగోలు చేయడానికి ప్రతిపాదనలు రూపొందించాలని ఏపీ ఏవియేషన్ అకాడమీని ఆదేశించారు.
ప్రస్తుతం జిల్లాల పర్యటనకు జీఎంఆర్ కు చెందిన విమానాలు, హెలికాప్టర్లను చంద్రబాబు ఉపయోగిస్తున్నారు. భిన్నమైన వాతావరణ పరిస్థితుల్లో ప్రయాణించడానికి హెలికాప్టర్ పూర్తిగా అనువుగా ఉండదు కాబట్టి, అలాంటి సమయాల్లో ఉపయోగించుకోవడానికి విమానాన్ని కూడా కొనుగోలు చేయనున్నారు.తాజా పరిస్థితి చూస్తుంటే.. ఇద్దరు సీఎంలకు దాదాపుగా ఒకే సమయంలో కొత్త హెలికాప్టర్లు అందే అవకాశాలు కనిపిస్తున్నాయి.

Read more...

బాబు కోరిక తీరుతుందా..?

సింగపూర్ తరహాలో ఏపీ రాజధాని నిర్మాణానికి కసరత్తును వేగవంతం చేసింది చంద్రబాబు ప్రభుత్వం. రాజధాని ఎలా ఉండాలన్న దానిపై ఇప్పటికే ఓ సలహా మండలి, మరో సబ్ కమిటీ పనిచేస్తుండగా.. ఇటీవలే అంతర్జాతీయ కన్సెల్టెన్సీ మెకన్సీ నుంచి ఓ నివేదికను కూడా తెప్పించుకుంది. రాజధానిలో 40 అంతస్థుల భవనాలను నిర్మిస్తే ఉపయోగకరంగా ఉంటుందని ఆ నివేదికలో ఉన్నట్లు ప్రభుత్వ వర్గాలు చెబుతున్నాయి. విజయవాడలో కృష్ణానదికి ఇరువైపులా ప్రభుత్వ ఆఫీసులను ఏర్పాటు చేస్తూ.. మూడు ఫ్లై ఓవర్లను నిర్మించాలనీ రిపోర్ట్లో ఉన్నట్లు తెలుస్తోంది.
    అన్ని రంగాల్లోనే అభివృద్ధిని సాధించిన హైదరాబాద్ కు ధీటుగా రాజధాని నిర్మాణం చేయాలన్నది చంద్రబాబు ఆలోచనగా కనిపిస్తోంది. హైదరాబాద్ కోసం కేంద్ర, రాష్ట్ర ప్రభుత్వాలు గత ఐదు దశాబ్ధాల్లో 15 లక్షల కోట్ల వరకూ ఖర్చుపెట్టాయంటున్న ఆయన.. అలాంటి నగరాన్ని ఇప్పటికిప్పుడు సృష్టించాలంటే.. కనీసం నాలుగైదు లక్షల కోట్లు ఖర్చవుతుందన్నారు. తిరుపతిలో జరిగిన ఆర్థికసంఘం సమావేశంలో దీనిపై ఆయన ప్రజెంటేషన్ ఇచ్చారు. ఇందులో కేంద్రం సాయంగా లక్షా 2 వేల కోట్లను ఇవ్వాలని కోరారు. దీంతో పాటు, కేంద్రం దగ్గర రాష్ట్రానికి ఉన్న రూ. 10400 కోట్ల అప్పులను రద్దు చేయాలని, అప్పులు మరింతగా తెచ్చుకోవడానికి FBRM చట్టాన్ని సవరించాలని విజ్ఞప్తి చేశారు. మరి ఈ విజ్ఞప్తులకు కేంద్రం ఎంతవరకూ సహకరిస్తుందన్నదే ఇప్పుడు అసలు ప్రశ్న. రైతు రుణమాఫీ విషయంలో కేంద్ర సహకారాన్ని ఎంతో ఆశించిన బాబుకు.. చుక్కెదురయ్యింది. ఇప్పుడు రాజధాని వ్యవహారంలో కేంద్రం తీరు ఎలా ఉండొచ్చన్నదానిపై ప్రభుత్వ వర్గాల్లో ఆసక్తికర చర్చ సాగుతోంది..

Read more...

ఏపీ రాజధాని ఎక్కడ?

ఆంధ్రప్రదేశ్ రాజధానిపై నెలకొన్న ఉత్కంఠ మరికాసేపట్లో తొలిగిపోనుంది. ముహూర్తం ప్రకారం 12 గంటల 17 నిమిషాలకు ఏపీ సీఎం చంద్రబాబు , రాజధానిపై అసెంబ్లీలో ప్రకటన చేయనున్నారు. అయితే, ఆయన నోటినుంచి ఏ ప్రాంతం పేరు వస్తుందన్నదే ఇప్పుడు మరింత టెన్షన్ రేకెత్తిస్తోంది.
      విజయవాడ-గుంటూరు మధ్యే రాజధాని అంటూ చాలాకాలంగా చంద్రబాబు సహా టీడీపీ  నేతలు చెప్పుకుంటూనే వస్తున్నారు. ఈ ప్రాంతమైతేనే రాష్ట్రం మొత్తానికి మధ్యన ఉంటుందన్నది తెలుగుతమ్ముళ్ల అభిప్రాయం. అయితే.. ఈ రెండింటిని ఉమ్మడిగా రాజధానిగా ప్రకటిస్తారా.. లేక... రెండింటి మధ్యన ఉన్న మంగళగిరిని రాజధానిగా ప్రకటిస్తారా అన్నది తేలాల్సి ఉంది. అంతేకాదు, ఇక్కడ భూముల లభ్యత తక్కువగా ఉండడంతో, అమరావతిని గానీ, గన్నవరం, నూజివీడులను గానీ ప్రకటించవచ్చనీ వాదనలు వినిపిస్తున్నాయి. అయితే, ఈ విషయంలో ఇంతవరకూ ఎలాంటి లీకులనూ ఇవ్వలేదు చంద్రబాబు. దీంతో.. అసెంబ్లీలో ఆయన ఎలాంటి ప్రకటన చేస్తారన్నది హాట్ టాపిక్ అయ్యింది. అయితే.. రాజధాని పేరు నేరుగా చెప్పకుండా, విజయవాడ-గుంటూరు మధ్య ఏర్పాటు చేస్తామని, సలహాలు, అభిప్రాయాలను చెప్పమంటూ సభను చంద్రబాబు కోరవచ్చన్న వాదనా వినిపిస్తోంది. దీంతో పాటు.. కమిటీల బాబుగా పేరున్న టీడీపీ అధినేత ఈ విషయంలో మరో కమిటీ వేసినా ఆశ్చర్యం లేదంటున్నారు తెలుగు తమ్ముళ్లు.

Read more...

రుణమాఫీ అన్నంవండి పెట్టడం లాంటిదేనట

రుణమాఫీకి తెలుగుదేశం పార్టీ ఎమ్మెల్సీ నన్నపనేని రాజకుమారి శాసనమండలిలో కొత్త భాష్యం చెప్పారు. చంద్రబాబు ప్రమాణస్వీకారం చేసిన రోజునే మాఫీపై ఓ కమిటీని ఏర్పాటు చేశారన్న ఆమె, దాన్ని పొయ్యి ఏర్పాటు చేయడం లాంటిదన్నారు. అన్నం పెట్టాలంటే ముందుగా పొయ్యి ఏర్పాటు చేసుకోవాలని, సీమాంధ్రలో ప్రస్తుతం పొయ్యి లేదన్నారు నన్నపనేని. అందులో మంట పెట్టాలని, బియ్యంలో రాళ్లు ఏరాలని, కడగి వండాలని, ఆ తర్వాత ఆ అన్నంలోకి కాస్త పచ్చడైనా వేయాల్సి ఉంటుందన్నారామె. అంటే, రైతురుణమాఫీని అమలు చేయడానికి ఇంత ప్రాసెస్ ఉంటుందని చెప్పకనే చెప్పారు రాజకుమారి.

Read more...

మాఫీ మాయమవుతుందా..?

రుణమాఫీపై చంద్రబాబు సర్కార్ పిల్లిమొగ్గలేస్తోంది. ఎంత కష్టమైనా, ఎంత భారమైనా రుణమాఫీ అమలు చేస్తామంటూ ఓట్ల కోసం ఎన్నికల్లో హామీ ఇచ్చిన చంద్రబాబు.. ప్రభుత్వాన్ని ఏర్పాటు చేసి పదిహేను రోజులవుతున్నా ఇంతవరకూ దానిపై ఒక్క అడుగు కూడా ముందుకు వేయలేదు. ఎంత రుణం ఉన్నా మాఫీ చేస్తామని గతంలో చెప్పిన టీడీపీ అధినేత, ఇప్పుడు లక్షన్నరకే పరిమితమయ్యేలా కనిపిస్తున్నారు. అంతేకాదు పంటరుణాలతో పాటు, బంగారంపై తీసుకున్న రుణాలను కూడా మాఫీ చేస్తామని హామీ ఇచ్చేసిన ఆయన ఇప్పుడు, అందులో ఏదో ఒకటే మాఫీ చేస్తానంటున్నాడు. అయినా, బ్యాంకర్లు ముందుకు రావడం లేదంటూ కొత్త పాట పాడుతున్నారు తెలుగుదేశం నేతలు. ఇదంతా చూస్తుంటే రుణమాఫీపై వెనకడుగు వేసేలానే కనిపిస్తోంది. పైగా, కేంద్రం, బ్యాంకర్లు సహకరించడం లేదంటూ దొంగఏడ్పులు మొదలుపెట్టారు. హామీ ఇచ్చింది తెలుగుదేశం పార్టీ గానీ, ఎన్డీఏ కాదు.. హామీ ఇచ్చింది టీడీపీ కానీ, బ్యాంకర్లు కాదు.. ఈ హామీ ఇచ్చినప్పుడు ఎన్డీఏను గానీ, బ్యాంకర్లను గానీ చంద్రబాబు సంప్రదించలేదు వారినుంచి హామీ పొందలేదు. అలాంటప్పుడు మీరిచ్చిన హామీ నెరవేర్చడానికి, బ్యాంకర్లను, కేంద్ర ప్రభుత్వానికి మసి పూయాలని చూడడం ఎంతవరకూ సమంజసం ? మాఫీ అమలు చేయకపోతే మాత్రం జనం చంద్రబాబు వచ్చిన అధికారాన్ని మాఫీ చేసేస్తారు..

Read more...

ఆంధ్రప్రదేశ్ అవతరణ ఎప్పుడు?

మహా ప్రస్థానం ముగిసింది. సుమారు ఆరు దశాబ్దాల పాటు కలిసి ఉన్న తెలుగునేల విడిపోతోంది. జూన్ 2న తెలంగాణ రాష్ట్రం అధికారికంగా తెరపైకి రాబోతోంది. దశాబ్దాల తరబడి సాగిన ఉద్యమాలు, పోరాటాలు, ఎంతోమంది అమరుల త్యాగాలకు అసలైన నివాళి లభించబోతోంది. ఇంతవరకూ సెప్టెంబర్17ను విమోచన దినోత్సవంగా ఘనంగా జరుపుకున్న తెలంగాణ వాదులు, ఇకపై జూన్ 2 రాష్ట్ర అవతరణ దినోత్సవంగా జరుపుకోబోతున్నారు. తెలంగాణ వరకూ అంతా బాగానే ఉన్నా.. ఆంధ్రప్రదేశ్ అవతరణ దినోత్సవం ఏదన్నదే ఇప్పుడు ప్రశ్నార్థకంగా మారింది.
    రాష్ట్రం విడిపోవడం సీమాంధ్ర ప్రజలకు ఏమాత్రం ఇష్టం లేదు. కాబట్టి జూన్ 2 వారికి సంబంధించినంతవరకూ విద్రోహ దినమే తప్ప అవతరణ దినోత్సవం కాదు. ఇక చంద్రబాబు ప్రమాణ స్వీకారం చేసే జూన్ 8ని కూడా అవతరణ దినోత్సవంగా స్వీకరిస్తారా లేదా అన్నదీ అనుమానమే. ఇంతవరకూ జరుపుకుంటూ వచ్చిన నవంబర్ 1 కి ఇకపై ప్రాధాన్యత ఉండనే ఉండదు. ఎందుకంటే, అది ఆంధ్రరాష్ట్రం, హైదరాబాద్ రాష్ట్రాలు కలిసి ఆంధ్రప్రదేశ్ గా అవతరించిన సందర్భం. ఇప్పుడు హైదరాబాద్ స్టేట్ కు సంబంధించిన ఏ ప్రాంతమూ ఆంధ్రప్రదేశ్ లో భాగం కాదు కాబట్టి, నవంబర్ 1 ఆ అర్హత కోల్పోయింది. పోనీ ఆంధ్ర రాష్ట్రం అవతరించిన అక్టోబర్ 1ని జరుపుకుందామంటే, దానికీ ఇప్పుడు పెద్దగా ప్రాధాన్యం ఉండదు. ఎందుకంటే, అక్టోబర్ 1కి ఇప్పటి పరిస్థితులకు ఏమాత్రం సంబంధం లేదు. దీంతో, కొత్త ప్రభుత్వం రాష్ట్ర దినోత్సవంగా దేన్ని ఎంపిక చేస్తుందన్నది ఆసక్తికరంగా మారింది. రాష్ట్రపతి పాలన ముగిసి ప్రజా ప్రభుత్వం ఏర్పడుతుంది కాబట్టి, అందులోనూ చంద్రబాబు సీఎంగా ప్రమాణ స్వీకారం చేస్తారు కాబట్టి, జూన్ 8నే చరిత్రలో మిగిలిపోయేలా చేయడానికి ఆ రోజునే అవతరణ దినోత్సవంగా ప్రకటించే అవకాశాలు ఎక్కువగా కనిపిస్తున్నాయి. కానీ, దానికి జనం నుంచి ఎలాంటి స్పందన వస్తుందన్నదే ఇప్పుడు ఉత్కంఠను కలిగిస్తోంది.

Read more...

అసలు తెలంగాణను విడదీయాల్సిన అవసరం లేదు..

ఎవరి నోట విన్నా ఇదే మాట. దేశంలో ఇప్పటివరకూ జరిగిన రాష్ట్రాల విభజనల్లో రాజధాని ఉన్న ప్రాంతం విడిపోవాలని కోరుకోలేదని, విడిపోయినవన్నీ ఓ మూలగా ఉన్న ప్రాంతాలేనని చాలామంది పెద్దలు సెలవిస్తున్నారు. చివరకు మొన్న మీడియా సమావేశంలోనూ సీఎం కిరణ్ ఇదే మాట వల్లించారు. వీరందరి వాదనా భాగానే ఉంది. కానీ నాకు అర్థం కాని విషయం ఒక్కటే..
ఆంధ్ర, తెలంగాణ కలిసినప్పుడు హైదరాబాద్ ను వీరేమైనా తెచ్చి తెలంగాణకు ఇచ్చారా..? ఆంధ్ర తెలంగాణ కలిసిన తర్వాతే, హైదరాబాద్ రాజధాని అయ్యిందా..?

    రెండింటికీ సమాధానం ఒక్కటే. అసలు ఆంధ్ర నుంచి తెలంగాణ ఎందుకు విడిపోవాలి..? తెలంగాణ ప్రాంతం ఏమీ ఆంధ్రతో కలవడానికి ఎగబడలేదే..  నిబంధనలు పక్కనపెట్టి ఆంధ్రప్రాంతంతో కలవలేదే.. ఆంధ్ర ప్రాంతమే కదా కోరి కోరి వచ్చిమరీ హైదరాబాద్ తో కలిసింది. అందుకని, ఇప్పుడున్న రాష్ట్రం నుంచి తెలంగాణ విడిపోవాల్సిన అవసరం లేనేలేదు. ప్రస్తుత రాష్ట్రం నుంచి ఆంధ్ర ప్రాంతాన్నే విడదీస్తే సరిపోతుంది. అప్పుడు, రాజధానికి దూరంగా ఉన్న ప్రాతం విడిపోతుంది కాబట్టి, రాజధాని విషయంలో గొడవే ఉండదు. తెలంగాణ ప్రాంతానికి ఆంధ్రప్రదేశ్ అన్న పేరే ఉంచొచ్చు (రాష్ట్ర విభజన ప్రక్రియ పూర్తైన తర్వాత కావలంటే తెలంగాణగా మార్చుకోవచ్చు (ఉత్తరాంచల్ ఉత్తరాఖండ్ అయినట్లు, ఒరిస్సా ఒడిషా అయినట్లు). ఇక కొత్తగా ఏర్పాటు చేసే ఆంధ్ర ప్రాంతానికి రెండు ప్రాంతాల వారికీ ఆమోదయోగ్యంగా సీమాంధ్ర అన్న పేరుపెట్టొచ్చు. దీంతో గొడవే ఉండదు..

Read more...

సెటిలర్లకు నిజంగానే సమస్యా?

రాష్ట్ర విభజనతో హైదరాబాద్ లో ఉన్న సీమాంధ్రులు ఆందోళన చెందుతున్నారంటూ సీమాంధ్ర నేతలు కొంతమంది తీవ్రంగా  వాదిస్తున్నారు. హైదరాబాద్లో ఉన్నవాళ్లకు భద్రత ఏదంటూ ప్రశ్నలమీద ప్రశ్నలు గుప్పిస్తున్నారు. హైదరాబాద్ లోనూ, తెలంగాణ ప్రాంతంలోనూ వచ్చి స్థిరపడ్డవాళ్లపై ఎక్కడలేని ప్రేమనూ ఒలకబోస్తున్నారు. కానీ, వాస్తవాన్ని మాత్రం వాళ్లు గ్రహించలేకపోతున్నారు. ఎందుకంటే, మాకు రక్షణ లేదంటూ, హైదరాబాద్ లో గానీ, తెలంగాణలో గానీ ఒక్క సెటిలర్ కూడా ఇంతవరకూ తమ భద్రతకు సమస్య వచ్చిందని భయపడడంలేదు. రోడ్డెక్కి ఆందోళనకూ దిగలేదు. ఏ పోలీస్ స్టేషన్ లోనూ తమకు సెక్యూరిటీ కావాలని అడగలేదు.

అంతెందుకు, తెలంగాణలోని నిజామాబాద్, మెదక్, కరీంనగర్, వరంగల్, నల్గొండ, ఖమ్మం జిల్లాల్లో ఐదు దశాబ్దాలకు ముందే వచ్చి స్ధిరపడ్డ ఆంధ్రా కుటుంబాలు ఎన్నో ఉన్నాయి. వీళ్లకు తమ సొంత ప్రాంతాల్లో అంగుళం భూమి గానీ, అర్థరూపాయి ఆస్తిగాని లేదు. తెలంగాణ ఉద్యమం మొదలై పదమూడేళ్లుగా సాగుతున్నా, గత మూడేళ్లలో కనీవినీ ఎరుగుని రీతిలో ఉధృతంగా సాగినా, ఒక్క సెటిలర్ కూ ఇబ్బంది రాలేదు. ఇలా స్థిరపడ్డ కుటుంబాల్లో ఒక్క కుటుంబం కూడా ఆంధ్రాకు తిరిగి వలస పోలేదు. ఎందుకంటే, వాళ్లూ ఇక్కడ భూమితో, ఇక్కడి సమాజంతో మమేకమైపోయారు. ఆంధ్రా కుటుంబాల్లో ఎంతో మంది ఇక్కడే పుట్టి ఇక్కడే పెరిగిన వాళ్లున్నారు. వాళ్లూ తెలంగాణ బిడ్డలే.

ఈ విషయాన్ని పక్కన పెడితే, సీమాంధ్ర నేతలు, సీమాంధ్రలో ఉండి తెలంగాణలో ఉన్న తమవాళ్ల గురించి ఆందోళన చెందుతున్న వాళ్లు  తెలుసుకోవాల్సిన విషయం మరొకటి ఉంది. హైదరాబాద్ లోని నిత్యావసర హోల్ సేల్ దుకాణాల్లో 90 శాతం తెలుగువాళ్లవి కాదు. రాజస్థాన్ నుంచి వచ్చిన వారే ఎక్కువగా ఈ దుకాణాలను నడుపుతున్నారు. హార్డ వేర్, ఎలక్ట్రానిక్స్ దుకాణాలూ 80 శాతానికి పైగా తెలుగువాళ్లవి కాదు, గుజరాత్ మార్వాడీల చేతుల్లోనే ఉన్నాయి. కోఠిలో గుజరాత్ గల్లీ పేరిట పెద్ద వాణిజ్య ప్రాంతమే ఉంది. ఇక బంగారం దుకాణాలు.. హైదరాబాద్లో ఉన్నవాటిలో ఒక్కటంటే ఒక్కటీ తెలుగువాళ్లది కాదు. హైదరాబాద్లో వీధికొక్కటి కనిపించే చాట్ బండార్స్ నడిపేవాళ్లలో ఒక్కరూ తెలుగువాళ్లు కాదు. వీళ్లెవరకూ విభజనతో రానిసమస్య ఆంధ్రాప్రాంతం నుంచి వచ్చి స్థిరపడ్డ తెలుగువాళ్లకు వస్తుందని ఆందోళన చెందాల్సిన పనేలేదు. అనవసరంగా రాజకీయ నాయకులు ఏదేదో ఊహించుకుని, నోటికొచ్చి మాట్లాడి, ఇక్కడ ఉన్నవాళ్లలో అనవసరమైన అనుమానాలు లేపకుండా ఉంటే అదే పదివేలు.

Read more...

పదేళ్లపాటు ఉమ్మడి రాజధానిగా హైదరాబాద్

తెలంగాణకు ఓటేసింది కాంగ్రెస్ పార్టీ. రాష్ట్ర విభజనకు అంగీకారం తెలుపుతూ కేంద్ర ప్రభుత్వానికి ప్రతిపాదన పంపించింది. సుదీర్ఘకాలంగా ఉన్న తెలంగాణ డిమాండ్ ను తాము ఆమోదిస్తున్నామని, పది జిల్లాల తెలంగాణ ఏర్పాటుకు అంగీకరిస్తున్నామని ప్రకటించింది. అయితే, రెండు ప్రాంతాల్లోని ప్రజలు, ఒక ప్రాంతంలో ఉంటున్న మరో ప్రాంత ప్రజలకు(సెటిలర్లు) ఇబ్బందులు కలగకుండా అన్ని జాగ్రత్తలను తీసుకుంటామని తెలిపింది. పదేళ్లపాటు రెండు రాష్ట్రాలకు హైదరాబాదే ఉమ్మడి రాజధానిగా ఉండాలని డిసైడ్ చేసింది కాంగ్రెస్.  ఈ పదేళ్లలో సీమాంధ్ర ప్రాంతంలో కొత్త రాజధానిని ఏర్పాటు చేస్తామని తెలిపింది. నిర్ణీత కాలపరిమితిలోగా రాష్ట్రాన్ని విభజించాలని సిడబ్ల్యూసీలో తీర్మానించింది. ఏ ప్రాంతానికి అన్యాయం జరగకుండానే ఈ విభజన ప్రక్రియ ఉంటుందని ప్రకటించింది కాంగ్రెస్ పార్టీ. సీమాంధ్ర ప్రాంతాన్ని సంతృప్తి పరచడానికి పోలవరానికి జాతీయహోదాను ప్రకటించింది. సీమాంధ్ర ప్రాంతం ఆంధ్రప్రదేశ్ గానే ఉంచాలని నిర్ణయం తీసుకుంది కాంగ్రెస్.

Read more...

రాష్ట్రం విడిపోతే రెండు ప్రాంతాలు ఎలా ఉంటాయి..?

రాష్ట్రం విడిపోతే తెలంగాణ సీమాంధ్ర ప్రాంతాలు ఎలా ఉంటాయన్నదానిపై రాష్ట్ర వ్యాప్తంగా చర్చసాగుతోంది. దీనికి సమాధానమే ఈ మ్యాప్. ఏ ప్రాంతంలో ఏ ఏ వనరలున్నాయో సవివరంగా దీనిద్వారా తెలుసుకోవచ్చు. (ఇండియాటుడే సౌజన్యంతో)

Read more...