హైదరాబాద్ లో పనిచేస్తున్న ప్రభుత్వ ఉద్యోగులకు శుభవార్త. ఇకపై వారానికి ఐదురోజులే పనిదినాలను ప్రభుత్వ కార్యాలయాల్లో అమలు చేయాలని ప్రభుత్వం భావిస్తోంది. విద్యుత్ సంక్షోభానికి పరిష్కారాలను వెదుకుతున్న ప్రభుత్వం.. ఈ ఐదు రోజుల పనిదినాలను కూడా అందులో భాగంగానే అమలు చేయాలనుకొంటోంది. వారానికి ఐదు రోజులే ప్రభుత్వ కార్యాలయాలను తెరవడం ద్వారా, 5 నుంచి 6 మిలియన్ విద్యుత్ యూనిట్లను ఆదా చేయవచ్చని అధికారులు భావిస్తున్నారు. దీనిపై సీఎం కిరణ్ తో చర్చలు జరిపారు. త్వరలోనే ప్రభుత్వం అధికారికంగా ఈ ప్రకటన చేసే అవకాశం ఉంది. అయితే.. వారంలో ఆరు రోజులు పనిచేస్తేనే పెండింగ్ లో ఎన్నో ఫైళ్లు పడుతున్న ప్రస్తుత పరిస్థితుల్లో.. ఐదురోజుల పనిదినాల పద్ధతిపై మాత్రం సామాన్యుల్లో అసంతృప్తే వ్యక్తమవుతోంది.
