రుణమాఫీ అన్నంవండి పెట్టడం లాంటిదేనట

రుణమాఫీకి తెలుగుదేశం పార్టీ ఎమ్మెల్సీ నన్నపనేని రాజకుమారి శాసనమండలిలో కొత్త భాష్యం చెప్పారు. చంద్రబాబు ప్రమాణస్వీకారం చేసిన రోజునే మాఫీపై ఓ కమిటీని ఏర్పాటు చేశారన్న ఆమె, దాన్ని పొయ్యి ఏర్పాటు చేయడం లాంటిదన్నారు. అన్నం పెట్టాలంటే ముందుగా పొయ్యి ఏర్పాటు చేసుకోవాలని, సీమాంధ్రలో ప్రస్తుతం పొయ్యి లేదన్నారు నన్నపనేని. అందులో మంట పెట్టాలని, బియ్యంలో రాళ్లు ఏరాలని, కడగి వండాలని, ఆ తర్వాత ఆ అన్నంలోకి కాస్త పచ్చడైనా వేయాల్సి ఉంటుందన్నారామె. అంటే, రైతురుణమాఫీని అమలు చేయడానికి ఇంత ప్రాసెస్ ఉంటుందని చెప్పకనే చెప్పారు రాజకుమారి.

Read more...

మాఫీ మాయమవుతుందా..?

రుణమాఫీపై చంద్రబాబు సర్కార్ పిల్లిమొగ్గలేస్తోంది. ఎంత కష్టమైనా, ఎంత భారమైనా రుణమాఫీ అమలు చేస్తామంటూ ఓట్ల కోసం ఎన్నికల్లో హామీ ఇచ్చిన చంద్రబాబు.. ప్రభుత్వాన్ని ఏర్పాటు చేసి పదిహేను రోజులవుతున్నా ఇంతవరకూ దానిపై ఒక్క అడుగు కూడా ముందుకు వేయలేదు. ఎంత రుణం ఉన్నా మాఫీ చేస్తామని గతంలో చెప్పిన టీడీపీ అధినేత, ఇప్పుడు లక్షన్నరకే పరిమితమయ్యేలా కనిపిస్తున్నారు. అంతేకాదు పంటరుణాలతో పాటు, బంగారంపై తీసుకున్న రుణాలను కూడా మాఫీ చేస్తామని హామీ ఇచ్చేసిన ఆయన ఇప్పుడు, అందులో ఏదో ఒకటే మాఫీ చేస్తానంటున్నాడు. అయినా, బ్యాంకర్లు ముందుకు రావడం లేదంటూ కొత్త పాట పాడుతున్నారు తెలుగుదేశం నేతలు. ఇదంతా చూస్తుంటే రుణమాఫీపై వెనకడుగు వేసేలానే కనిపిస్తోంది. పైగా, కేంద్రం, బ్యాంకర్లు సహకరించడం లేదంటూ దొంగఏడ్పులు మొదలుపెట్టారు. హామీ ఇచ్చింది తెలుగుదేశం పార్టీ గానీ, ఎన్డీఏ కాదు.. హామీ ఇచ్చింది టీడీపీ కానీ, బ్యాంకర్లు కాదు.. ఈ హామీ ఇచ్చినప్పుడు ఎన్డీఏను గానీ, బ్యాంకర్లను గానీ చంద్రబాబు సంప్రదించలేదు వారినుంచి హామీ పొందలేదు. అలాంటప్పుడు మీరిచ్చిన హామీ నెరవేర్చడానికి, బ్యాంకర్లను, కేంద్ర ప్రభుత్వానికి మసి పూయాలని చూడడం ఎంతవరకూ సమంజసం ? మాఫీ అమలు చేయకపోతే మాత్రం జనం చంద్రబాబు వచ్చిన అధికారాన్ని మాఫీ చేసేస్తారు..

Read more...

ఆంధ్రప్రదేశ్ అవతరణ ఎప్పుడు?

మహా ప్రస్థానం ముగిసింది. సుమారు ఆరు దశాబ్దాల పాటు కలిసి ఉన్న తెలుగునేల విడిపోతోంది. జూన్ 2న తెలంగాణ రాష్ట్రం అధికారికంగా తెరపైకి రాబోతోంది. దశాబ్దాల తరబడి సాగిన ఉద్యమాలు, పోరాటాలు, ఎంతోమంది అమరుల త్యాగాలకు అసలైన నివాళి లభించబోతోంది. ఇంతవరకూ సెప్టెంబర్17ను విమోచన దినోత్సవంగా ఘనంగా జరుపుకున్న తెలంగాణ వాదులు, ఇకపై జూన్ 2 రాష్ట్ర అవతరణ దినోత్సవంగా జరుపుకోబోతున్నారు. తెలంగాణ వరకూ అంతా బాగానే ఉన్నా.. ఆంధ్రప్రదేశ్ అవతరణ దినోత్సవం ఏదన్నదే ఇప్పుడు ప్రశ్నార్థకంగా మారింది.
    రాష్ట్రం విడిపోవడం సీమాంధ్ర ప్రజలకు ఏమాత్రం ఇష్టం లేదు. కాబట్టి జూన్ 2 వారికి సంబంధించినంతవరకూ విద్రోహ దినమే తప్ప అవతరణ దినోత్సవం కాదు. ఇక చంద్రబాబు ప్రమాణ స్వీకారం చేసే జూన్ 8ని కూడా అవతరణ దినోత్సవంగా స్వీకరిస్తారా లేదా అన్నదీ అనుమానమే. ఇంతవరకూ జరుపుకుంటూ వచ్చిన నవంబర్ 1 కి ఇకపై ప్రాధాన్యత ఉండనే ఉండదు. ఎందుకంటే, అది ఆంధ్రరాష్ట్రం, హైదరాబాద్ రాష్ట్రాలు కలిసి ఆంధ్రప్రదేశ్ గా అవతరించిన సందర్భం. ఇప్పుడు హైదరాబాద్ స్టేట్ కు సంబంధించిన ఏ ప్రాంతమూ ఆంధ్రప్రదేశ్ లో భాగం కాదు కాబట్టి, నవంబర్ 1 ఆ అర్హత కోల్పోయింది. పోనీ ఆంధ్ర రాష్ట్రం అవతరించిన అక్టోబర్ 1ని జరుపుకుందామంటే, దానికీ ఇప్పుడు పెద్దగా ప్రాధాన్యం ఉండదు. ఎందుకంటే, అక్టోబర్ 1కి ఇప్పటి పరిస్థితులకు ఏమాత్రం సంబంధం లేదు. దీంతో, కొత్త ప్రభుత్వం రాష్ట్ర దినోత్సవంగా దేన్ని ఎంపిక చేస్తుందన్నది ఆసక్తికరంగా మారింది. రాష్ట్రపతి పాలన ముగిసి ప్రజా ప్రభుత్వం ఏర్పడుతుంది కాబట్టి, అందులోనూ చంద్రబాబు సీఎంగా ప్రమాణ స్వీకారం చేస్తారు కాబట్టి, జూన్ 8నే చరిత్రలో మిగిలిపోయేలా చేయడానికి ఆ రోజునే అవతరణ దినోత్సవంగా ప్రకటించే అవకాశాలు ఎక్కువగా కనిపిస్తున్నాయి. కానీ, దానికి జనం నుంచి ఎలాంటి స్పందన వస్తుందన్నదే ఇప్పుడు ఉత్కంఠను కలిగిస్తోంది.

Read more...

జగన్ కు నిద్రపట్టదా..?

ఎన్నికల్లో ఓటమి పాలవడంతో ఆశలన్నీ అడియాశలై.. తీవ్ర నిరుత్సాహంలో ఉన్న వైసీపీ అధినేత జగన్ కు భవిష్యత్తులో మరిన్ని చిక్కులు చుట్టుముట్టు అవకాశాలు కనిపిస్తున్నాయి. వైసీపీ ఎంపీలు ఎస్పీవై రెడ్డి, బుట్టా రేణుకలు టీడీపీలోకి జంప్ చేయడం కూడా జగన్ కు ఇబ్బందికరంగానే మారింది. ఒకప్పుడు కాంగ్రెస్ ను, టీడీపీని బలహీన పరచడానికి వైఎస్సార్, జగన్ ను ఏ సూత్రాన్నైతే పాటించారో అదే సూత్రం ఇప్పుడు బూమరాంగ్ లా తిరిగి వైసీపీని కుదిపేస్తోంది.

పార్టీ నేతలు ఎక్కడ జంప్ చేస్తారో అన్న భయంతో ఇడుపులపాయలో నిర్వహించిన సమావేశంలోనే అందరితో ప్రమాణం చేయించారు జగన్. ఎవరం పార్టీ మారమని, వైసీపీతోనే కొనసాగుతామని ప్రతీ ఒక్కరి నోటితోనూ చెప్పించారు. అది జరిగి నాలుగు రోజులైనా కాకుండానే ఒట్టు తీసి గట్టుమీద పెట్టేశారు ఎస్పీవై రెడ్డి, బుట్టా రేణుక. ఫ్యాన్ స్విచ్ ఆపేసి సైకిల్ ఎక్కేశారు. వీరిపై వేటు తప్పదని వైసీపీ నేతలు చెబుతున్నా, అది ఎప్పటికవుతుందన్నది ఎవరికీ అర్థం కాని విషయమే. ఎందుకంటే, అనర్హత మీద నిర్ణయం తీసుకోవాల్సింది లోక్ సభ స్పీకర్. కానీ, వైసీపీకి వ్యతిరేకమైన బీజేపీ-టీడీపీ కూటమి అధికారంలో ఉండడంతో, వైసీపీ చేసే ఫిర్యాదుపై ఎంతవరకూ చర్యలుంటాయన్నది సందేహమే.

ఇక మిగిలిన నేతలు ఎప్పుడు పార్టీ గోడ దూకేస్తారో అన్న టెన్షన్ జగన్ కు ఉంటూనే ఉంటుంది. ప్రతీ నేతనూ అనుమానిస్తూనే ఉండాలి. ఇక పొరపాటున సీబీఐ కేసులు ముందుకు సాగి, మళ్లీ జైలుకు వెళ్లాల్సి వస్తే మాత్రం ఫ్యాన్ రెక్కలు ఊడిపోవడం ఖాయం. ఈ టెన్షన్లతో సతమతమవుతున్న జగన్ నిద్రలేని రాత్రులు గడుపుతున్నారనే చెప్పాలి. 

Read more...

రెండు రాష్ట్రాల్లోనూ చంద్రోదయం

బుద్ధపౌర్ణిమ వెళ్లి రెండు రోజులయ్యిందో లేదో.. అటు సీమాంధ్ర, ఇటు తెలంగాణ రెండు చోట్లా చంద్రోదయం అయ్యింది. అవును.. ఆంధ్రప్రదేశ్ లో చంద్రబాబు అధికారం అందుకుంటే.. తెలంగాణలో కె.చంద్రశేఖర్ రావు జయకేతనం ఎగరవేశారు. ఇద్దరి పేర్లలోనూ చంద్ర ఉండడం.. రెండు కొత్త రాష్ట్రాల్లో అధికారం అందుకోవడం విశేషమే మరి.

తెలంగాణలో పోటాపోటీగా ఎన్నికలు జరిగాయంటూ సర్వేలు చెప్పినా, కాంగ్రెస్ నేతలు తమదే విజయం అన్నా.. ప్రజాతీర్పు మాత్రం వన్ సైడ్ గానే వచ్చింది. టీఆర్ఎస్ కు పూర్తి స్థాయిలో మెజార్టీని కట్టబెట్టిన తెలంగాణ ప్రజలు, కాంగ్రెస్ ను మాత్రం పాతిక మార్కును దాటనివ్వలేదు. చాలామంది మంత్రులు, పీసీసీ చీఫ్ కూడా చుక్కలు చూపించారు తెలంగాణ ఓటర్లు..




సీమాంధ్రలో మాత్రం రెండు రకాల తీర్పులొచ్చాయి. ఉత్తరాంధ్ర, కోస్తా జిల్లాల్లో ఓటర్లు టీడీపీ పక్షాన నిలిస్తే, దక్షిణ కోస్తా, అనంత మినహా రాయలసీమ మిగిలిన మూడు జిల్లాల ప్రజలు మాత్రం వైసీపీ పక్షాన నిలబడ్డారు. జిల్లాల వారీగా టీడీపీ, వైసీపీ మధ్యే పోటీ నడిచింది. ఎక్కడా కాంగ్రెస్ ను ఖాతా తెరవనివ్వలేదు ఆంధ్ర ఓటర్లు.జిల్లాల వారీగా బలాబలాలు


శ్రీకాకుళం (10): టీడీపీ-7, వైసీపీ-3
విజయనగరం (9): టీడీపీ-6, వైసీపీ-3
విశాఖపట్నం (15): టీడీపీ-11, వైసీపీ-3, బీజేపీ-1
తూ.గో. (19): టీడీపీ-12, వైసీపీ-5, బీజేపీ-1, ఇండిపెండెంట్-1
ప.గో. (15): టీడీపీ-14, బీజేపీ-1
కృష్ణా (16): టీడీపీ-10, వైసీపీ-5, బీజేపీ-1
గుంటూరు (17): టీడీపీ-12, వైసీపీ-5
ప్రకాశం (12): వైసీపీ-6, టీడీపీ-5, ఇండిపెండెంట్-1
నెల్లూరు (10): వైసీపీ-7, టీడీపీ-3
చిత్తూరు (14): టీడీపీ-6, వైసీపీ-8
అనంతపురం (14): టీడీపీ-12, వైసీపీ-2
కడప (10): వైసీపీ-9, టీడీపీ-1
కర్నూలు (14): టీడీపీ-3, వైసీపీ-11

ఆళ్లగడ్డలో మాత్రం దివంగత నేత శోభానాగిరెడ్డినే గెలిపించారు అక్కడి ప్రజలు. ఆమె చనిపోయినా, ఆమెకు ఓటేస్తే ఉపఎన్నికలు వస్తాయని తెలిసినా, ఓటు ద్వారా ఆమెకు నివాళులు అర్పించారు ఆళ్లగడ్డ ఓటర్లు.

Read more...

సీమాంధ్రలో సైకిల్ సవారీ .. హస్తగతమైన తెలంగాణం

ఎన్నాళ్లుగానో పార్టీలను ఉత్కంఠకు గురి చేస్తున్న స్థానిక సంస్థల ఫలితాల్లో తొలి భాగమైన పురఫలితాలు స్పష్టమైన తీర్పును చెప్పాయి... సీమాంధ్రలో టీడీపీ స్పష్టమైన ఆధిపత్యాన్ని ప్రదర్శించింది. పుర ఫలితాలపై ఎన్నో ఆశలు పెట్టుకున్న వైసీపీ నాయకత్వాన్ని మాత్రం పట్టణ ఓటర్లు తీవ్రంగా నిరాశ పరిచారు. సీమాంధ్రలో మొత్తం 62 మున్సిపాలిటీలను టీడీపీ కైవసం చేసుకోగా, వైసీపీ 19 మున్సిపాలిటీలను మాత్రమే దక్కించుకుంది. వైఎస్ జగన్ సొంత జిల్లా కడపలోనూ ఐదు మున్సిపాలిటీలను టీడీపీ దక్కించుకోవడం విశేషం.  ఇక కాంగ్రెస్ ఒక్కచోటా ఖాతా తెరవకపోవడం ఆ పార్టీ దయనీయ స్థితికి అద్దం పడుతోంది. 11 మున్సిపాలిటీల్లో మాత్రం హంగ్ ఏర్పడింది. కార్పొరేషన్లలోనూ సైకిల్ జోరు కొనసాగింది. ఏడు కార్పొరేషన్లలో ఐదు కార్పొరేషన్లు ..రాజమండ్రి, ఏలూరు, విజయవాడ, చిత్తూరు, అనంతపురాన్ని టీడీపీ దక్కించుకుంది. కడప, నెల్లూరు కార్పొరేషన్లు మాత్రమే వైసీపీకి దక్కాయి.

    ఇక తెలంగాణ విషయానికి వస్తే కారు జోరుకు హస్తం అడ్డుగా నిలిచింది. మున్సిపాలిటీల్లో సింహభాగం కాంగ్రెస్ పార్టీకే దక్కి, ఆ పార్టీలో ఉత్సాహాన్ని నింపాయి. 21 మున్సిపాలిటీలను కాంగ్రెస్ దక్కించుకోగా, టీడీపీ రెండు, టీఆర్ఎస్ 8 మున్సిపాలిటిల్లో అధికారాన్ని అందుకున్నాయి. అయితే, ఈ సారి ఆశ్చర్యకరంగా, బీఎస్పీ రెండు మున్సిపాలిటీలను దక్కించుకోవడం విశేషం. ఎంఐఎం భైంసా మున్సిపాలిటీలో జయకేతనం ఎగరవేసింది. తెలంగాణలో మూడు కార్పొరేషన్లకు ఎన్నికలు జరగ్గా.. కరీంనగర్ కార్పొరేషన్లో మాత్రమే గులాబీ జెండా ఎగిరింది. నిజామాబాద్, రామగుండంలో హస్తం హవానే నడిచింది.

Read more...

భారీ ఓటింగ్‌తో ఛాన్స్ దక్కేదెవరికి?

రాజకీయ పార్టీల అంచనాలకు అతీతంగా సీమాంధ్ర ఓటర్లు పోలింగ్ కేంద్రాలకు వెల్లువలా తరలివచ్చారు. తమ తీర్పును ఈవీఎంలో నిక్షిప్తం చేశారు. అయితే, ఇంత భారీగా పోలింగ్ జరగడంతో, ఏ పార్టీకి విజయం దక్కుతుందన్నది ఇప్పుడు సస్పెన్స్‌గా మారింది. అటు టీడీపీ, ఇటు వైసీపీ రెండు పార్టీలు విజయం తమదంటే తమదని చెబుతున్నా.. లోలోన మాత్రం కాస్త ఆందోళనగానే కనిపిస్తున్నాయి. ప్రస్తుతానికి ఓటింగ్ సరళిని చూస్తుంటే, సీమాంధ్ర వైసీపీకే ఆధిక్యం దక్కే అవకాశాలున్నట్లు తెలుస్తోంది.

Read more...

సీమాంధ్రలో శివమెత్తిన ఓటర్లు

సీమాంధ్రలో ఓటర్లు శివమెత్తారు. కనీవినీ ఎరుగని రీతిలో పోలింగ్ కేంద్రాలకు తరలివచ్చారు. కొన్ని జిల్లాలో ఎండలు, మరికొన్ని జిల్లాల్లో వర్షాలు అడ్డంకులు సృష్టించినా, ప్రజాస్వామ్య స్ఫూర్తిని చాటి చెప్పారు సీమాంధ్ర ప్రజలు. మధ్యాహ్నం 3 గంటల సమయానికే సీమాంధ్రలో పోలింగ్ 63 శాతాన్ని దాటేసింది. సాయంత్రం 6 గంలకు పోలింగ్ ముగిసే సమయానికి ఇది 75 శాతం వరకూ చేరే సూచనలు కనిపిస్తున్నాయి. గుంటూరు, కడప జిల్లాల్లో టీడీపీ, వైసీపీ మధ్య దాడులు మినహా మిగిలిన చోట్ల చాలావరకూ ప్రశాంతంగానే పోలింగ్ జరిగింది.

Read more...

తెలంగాణ ముగిసింది.. ఆంధ్ర మిగిలింది

తెలంగాణలో ప్రచారం నేటితో ముగిసింది. హోరాహోరీగా సాగుతాయని భావిస్తున్న ఈ ఎన్నికలను ప్రతిష్టాత్మకంగా తీసుకున్న ప్రధాన పార్టీలు.. తొలి తెలంగాణ ప్రభుత్వాన్ని తామే ఏర్పాటు చేయాలన్న లక్ష్యంతో ఉధృతంగా ప్రచారం చేశాయి. బీజేపీ మోడీని బరిలోకి దించితే, కాంగ్రెస్ తరపున సోనియా, రాహుల్ రంగంలోకి దిగారు. అటు ఈ ఎన్నికలను ప్రతిష్టాత్మకంగా తీసుకున్న టీఆర్ఎస్ తరపున కేసీఆరే అన్నీ తానై తిరిగారు. టీఆర్ఎస్ చరిత్రలో ఎప్పుడూలేనంతగా ఉధృతంగా ఎన్నికల ప్రచారాన్ని నిర్వహించారు కేసీఆర్. అయితే తెలంగాణ ఎన్నికల ప్రచారంలో కాస్త వెనుకబడ్డా బీసీ సీఎం నినాదమే తమను గట్టెక్కిస్తుందన్న విశ్వాసంతో ఉంది టీడీపీ. వైసీపీ ప్రభావం అంతంతమాత్రంగానే ఉన్నా.. ఆ పార్టీ తరపున జగన్, షర్మిలను ప్రచారాన్ని జోరుగానే నిర్వహించారు..

తెలంగాణలో ప్రచారానికి తెరపడుతుండడంతో సీమాంధ్రపైకి దృష్టి మళ్లించాయి ప్రధాన పార్టీలు. ఇప్పటికే చంద్రబాబు కొన్ని జిల్లాల్లో ప్రచారం పూర్తి చేయగా, బాలయ్య కూడా విరామం లేకుండా ఆ పార్టీ తరపున ప్రచారం చేస్తున్నారు. కాంగ్రెస్ కు స్టార్ క్యాంపైనర్ గా చిరంజీవి తన పని మొదలుపెట్టారు. అన్నింటికీ మోడీ మంత్రాన్నే వల్లె వేస్తున్న బీజేపీ, సీమాంధ్రలోనూ ఆయన్నే ప్రచారానికి పిలుస్తోంది. ఏప్రిల్ 30, మే1 తేదీల్లో ఆయన సీమాంధ్రలో పలు సభల్లో పాల్గొననున్నారు. ఏప్రిల్ 30న తిరుపతిలో, మే 1న విశాఖలో బహిరంగ సభల్లో ఆయన పాల్గొననున్నారు. ఇక మే 2 సోనియా విశాఖ బహిరంగ సభలో పాల్గొంటారు. మోడీ సభ జరిగిన తర్వాతి రోజే సోనియా సభ జరుగుతుండడంతో దాన్ని ప్రతిష్టాత్మకంగా తీసుకున్నారు సీమాంధ్ర కాంగ్రెస్ నేతలు. అటు రాహుల్‌తో కూడా వీలైనంతగా సభలను నిర్వహించాలని భావిస్తున్నారు కాంగ్రెస్ నేతలు.

Read more...

కమలానికి సైకిల్ రాం..రాం.

టీడీపీ బీజేపీల మధ్య పొత్తు మూణ్ణాళ్ల ముచ్చటే అయ్యింది. సీమాంధ్రలో పొత్తును రద్దు చేసుకుంటున్నట్లు ప్రకటించారు టీడీపీ అధినేత చంద్రబాబు. మోడీని పీఎం చేయాలన్న ఉద్దేశంతోనే బీజేపీతో పొత్తు పెట్టుకున్నామన్న ఆయన, ఆ పార్టీ బలహీన అభ్యర్థులను నిలబెడుతోందని విమర్శించారు. దీనివల్ల ఇతర పార్టీలు లబ్ది పొందుతాయని, అందుకే ఆంధ్రప్రదేశ్లో పొత్తును రద్దు చేసుకుంటున్నామని ప్రకటించారు బాబు.
    అయితే, పురంధేశ్వరికి బీజేపీ టికెట్ ఇవ్వడం, రఘురామకృష్ణంరాజుకు నర్సాపురం టికెట్ ఇవ్వకపోవడం వల్లే పొత్తును రద్దు చేసుకున్నట్లు టీడీపీ వర్గాలు అనధికారికంగా చెబుతున్నాయి. ముందుగా చేసుకున్న ఒప్పందం ప్రకారం పురంధేశ్వరిని పూర్తిగా పక్కన పెట్టడానికి, నర్సాపురంలో రఘురామకృష్ణంరాజుకు టికెట్ ఇవ్వడానికి కమలం పార్టీ ఒప్పుకున్నట్లు తెలుస్తోంది. అయితే, ఆరెస్సెస్ నుంచి వత్తిడి పెరగడంతో గోకరాజు గంగరాజును నర్సాపురం అభ్యర్థిగా ప్రకటించింది బీజేపీ. దీంతో అవాక్కైన రఘురామకృష్ణంరాజు చంద్రబాబుతో చర్చలు జరిపారు. తాజాగా ఆయన టీడీపీ తరపునే నామినేషన్ వేసినట్లు తెలుస్తోంది. ఆంధ్రప్రదేశ్ లో పొత్తు రద్దైనప్పటికీ, తెలంగాణలో మాత్రం పొత్తు కొనసాగుతుందని టీడీపీ నేతలు చెబుతున్నారు.

దీనిపై తీవ్రంగా ఆగ్రహం వ్యక్తం చేస్తున్న బీజేపీ నేతలు, మోడీ, చంద్రబాబు సంయుక్త సభలు లేకుండా ఉండేలా చేస్తున్నట్లు తెలుస్తోంది.

Read more...

తొమ్మిది దశల్లో పోలింగ్

ఎన్నికల నగారా మోగింది. దేశవ్యాప్తంగా 9 విడతల్లో ఈ సారి ఎన్నికలు జరగనున్నాయి. ఆంధ్రప్రదేశ్లో  ఏప్రిల్ 30, మే 7న రెండు విడతల్లో ఎన్నికలను నిర్వహించనుంది ఈసీ. ముందుగా తెలంగాణలోనూ, ఆ తర్వాత ఆంధ్రలోనూ ఎన్నికలు జరుగుతాయి.  ఏప్రిల్ 7 న తొలి విడతలో 9 రాష్ట్రాల్లో ఎన్నికలు జరగనున్నాయి.  9న 14 రాష్ట్రాల్లో రెండో విడత పోలింగ్ జరుగుతుంది. 10న మూడో విడత, 12న నాలుగో విడత,  17న ఐదో విడత, 24న ఆరో విడత, 27న ఏడో విడత, మే 7న ఎనిమిదో విడత,  మే 12న తొమ్మిదో విడత ఎన్నికలు నిర్వహిస్తారు. మే 16న ఓట్ల లెక్కింపు జరుగుతుంది.  జూన్ 1 తో పార్లమెంట్ కాలపరిమితి, జూన్ 2తో ఆంధ్రప్రదేశ్ రాష్ట్ర అసెంబ్లీ కాలపరిమితి ముగియనుంది. జూన్ 2న తెలంగాణ ఆవిర్భావ దినోత్సవంగా కేంద్ర ప్రకటించడంతో ఆ రోజే కొత్త ప్రభుత్వం ఏర్పడే అవకాశాలున్నాయి. 

Read more...

జూన్ 2న ఆవిర్భవించనున్న తెలంగాణ

తెలంగాణ ఆవిర్భావ దినోత్సవం ఖరారయ్యింది. దేశంలో 29వ రాష్ట్రంగా ఏర్పడనున్న తెలంగాణ రాష్ట్రం జూన్ 2 నుంచి ఉనికిలోకి రానుంది. ఫిబ్రవరి 20 న పార్లమెంట్ ఆమోదంతో ఏర్పాటైన తెలంగాణ, జూన్ 2 నుంచే ప్రత్యేక రాష్ట్రంగా విధులను నిర్వహించనుంది. అయితే పార్లమెంట్ నిర్ణయం ప్రకారం పదేళ్లపాటు ఆంధ్రప్రదేశ్, తెలంగాణలకు హైదరాబాద్ ఉమ్మడి రాజధానిగా ఉండనుంది. ఎన్నికల నోటిఫికేషన్ వెలువడడానికి ముందే, తెలంగాణ ఆవిర్భావ దినోత్సవంపై కేంద్రం ప్రకటన చేయడంతో, రెండు రాష్ట్రాలకు వేరువేరు షెడ్యూల్స్ లో ఎన్నికలు జరగనున్నాయి.

Read more...

సీఎం కిరణ్ రాజీనామా

రాష్ట్ర పునర్వ్యవస్థీకరణ బిల్లును లోక్ సభ ఆమోదించడానికి నిరసనగా, ముఖ్యమంత్రి పదవికి, కాంగ్రెస్ పార్టీకి కిరణ్ కుమార్ రెడ్డి రాజీనామా చేశారు. తెలుగు ప్రజలను వంచించిస్తూ కాంగ్రెస్ పార్టీ రాష్ట్రాన్ని విభజిస్తోందని ఆయన ఆరోపించారు. తన రాజకీయ భవిష్యత్తు తనకు ముఖ్యం కాదని, తెలుగు ప్రజల భవిష్యత్తే అని ఆయన అన్నారు. రాష్ట్ర విభజన కారణంగా రెండు ప్రాంతాలకు అన్యాయం జరుగుతుందన్నారు కిరణ్ కుమార్ రెడ్డి. మరికాసేపట్లో ఆయన గవర్నర్ ను కలిసి తన రాజీనామాను సమర్పించనున్నారు. నవంబర్ 25, 2010న ఆంధ్రప్రదేశ్ 16వ ముఖ్యమంత్రిగా ప్రమాణ స్వీకారం చేసిన కిరణ్, మూడేళ్ల రెండు నెలల 19 రోజుల పాటు పదవిలో కొనసాగారు.

Read more...

సీమ, ఉత్తరాంధ్రకు స్పెషల్ ప్యాకేజీ

సీమాంధ్ర కేంద్ర మంత్రుల ఒత్తిడితో రాష్ట్ర విభజన బిల్లుకు పలు సవరణలు సూచిస్తూ జీవోఎం ఇచ్చిన నివేదికను పాక్షికంగా ఆమోదించింది కేంద్ర కేబినెట్. రాష్ట్ర విభజన బిల్లుకు ఆమోదం తెలిపింది. దీన్ని రాష్ట్రపతికి పంపి ఆయన్నుంచి వచ్చిన తర్వాత పార్లమెంట్ లో ప్రవేశపెట్టనుంది కేంద్రం. వీలైతే వచ్చేవారం మొదటి మూడు రోజుల్లో విభజన బిల్లును రాజ్యసభలో ప్రవేశ పెట్టే అవకాశం ఉంది.  ఆంధ్రప్రదేశ్ పునర్వ్యవస్థీకరణ బిల్లుపైనే చర్చించడానికి ప్రత్యేకంగా సమావేశమైన కేంద్ర కేబినెట్ దీనిపై విస్తృతంగా చర్చించింది. సీమాంధ్ర సమస్యలపైనే కేంద్రమంత్రి కావూరి అరగంటకుపైగా మాట్లాడినట్లు తెలుస్తోంది. అయితే, హైదరాబాద్ ను యూటీ చేయాలన్న ప్రతిపాదనను తోసి పుచ్చిన కేంద్ర కేబినెట్, గతంలో ఆమోదించిన పదేళ్లపాటు ఉమ్మడి రాజధానికే కట్టుబడి ఉండాలని నిర్ణయించింది. అయితే, పోలవరం ముంపు గ్రామాలను పూర్తిగా సీమాంధ్రలోనే కలపాలని, వెనుకబడిన ప్రాంతాలైన ఉత్తరాంధ్ర, రాయలసీమకు ప్రత్యేక ప్యాకేజీ ఇవ్వాలని నిర్ణయం తీసుకుంది కేంద్ర కేబినెట్. బిల్లు ఆమోదం పొందిన తర్వాత సీమాంధ్ర కొత్త రాజధానికి ఆర్థిక ప్యాకేజీ ప్రకటించనుంది కేంద్రం. 

Read more...

అసెంబ్లీలో గెలిచిందెవరు..?

రాష్ట్ర విభజన ప్రక్రియకు సంబంధించి కీలక ఘట్టం ముగిసిపోయింది. విజయం మాదంటే మాదంటున్నారు ఇరుప్రాంత నేతలు.. చర్చ ముగిసినందుకు తెలంగాణ వాదులది విజయం అనుకోవాలా.. లేక బిల్లును తిరస్కరించాలంటూ సీఎం ప్రవేశపెట్టిన తీర్మానం నెగ్గినందుకు సమైక్యవాదులు గెలిచారనుకోవాలా.. ఇదే ఇప్పుడు అందరినీ డైలమాలో పడేస్తోంది..

    చివరిరోజు ఏమవుతుందో అన్న టెన్షన్ లో అంతా ఉండగానే, ప్రక్రియను ముగించేశారు స్పీకర్ నాదెండ్ల మనోహర్. విభజన బిల్లుకు ఓ లక్ష్యం, ఓ ఆశయం లేదంటూ, అసలది బిల్లే కాదంటూ.. దాన్ని తిరస్కరించి పంపాల్సిందేనంటూ సీఎం కిరణ్ నోటీస్ ఇచ్చినప్పటి నుంచి సభ సజావుగా సాగడం లేదు. కేవలం వాయిదాలకే పరిమితం అవుతోంది. బీఏసీల మీటింగులు ఎన్ని నిర్వహించినా, పరిస్థితిలో మాత్రం మార్పు రాలేదు. సీఎం నోటీస్ తిరస్కరించాల్సిందేనంటూ తెలంగాణ ఎమ్మెల్యేలు, ఎట్టి పరిస్థితుల్లోనూ ఆమోదించాల్సిందేనంటూ సీమాంధ్ర ఎమ్మెల్యేలు శాసనసభలో ఆందోళనలకు దిగడంతో చర్చలో ప్రతిష్టంభన ఏర్పడింది. ఇక చివరి రోజు కూడా ఇవే సంఘటనలు సభలో పునరావృతమయ్యాయి. రెండుసార్లు సభ వాయిదా వేసి, మూడోసారి సమావేశ పరిచిన స్పీకర్.. అకస్మాత్తుగా చర్చా వివరాలను ప్రకటించి, ఇంతవరకూ రికార్డైన 86 మంది ప్రసంగాలలో పాటు ఎమ్మెల్యేలు ఇచ్చిన లిఖితపూర్వక సమాచారాన్ని, బిల్లుకు సూచించిన 9072 సవరణలను కలిపి రాష్ట్రపతికి పంపిస్తానని సభలో ప్రకటించారు. ఆ తర్వాత సీఎం ప్రవేశ పెట్టిన తీర్మానాన్ని సభ ముందు ఓటింగ్ కు ఉంచారు. మూజువాణి ఓటింగ్ ను నిర్వహించి.. తీర్మానం నెగ్గిందని చెప్పి సభను నిరవధికంగా వాయిదా వేశారు. ఇక్కడే అసలు గొడవ మొదలయ్యింది.

    రాష్ట్రపతి ఇచ్చిన గడువు ప్రకారం చర్చను ముగించేశారు స్పీకర్ నాదెండ్ల మనోహర్. సభ్యుల అభిప్రాయాలను రాష్ట్రపతికి పంపించనున్నారు. దీంతోపాటే, సభ బిల్లును తిరస్కరించాలని తీర్మానించిందంటూ రాష్ట్రపతికి పంపించనున్నారు. దీంతో బిల్లుపై రాష్ట్రపతి ఎలాంటి నిర్ణయం తీసుకుంటారన్నది ఉత్కంఠగా మారింది. అయితే, కేవలం అభిప్రాయాల కోసమే బిల్లును శాసనసభకు పంపించారు కాబట్టి, వాటినే రాష్ట్రపతి పరిగణనలోకి తీసుకుంటారన్న అభిప్రాయం చాలామందిలో వ్యక్తమవుతోంది. అయితే, బిల్లును తిరస్కరిస్తూ సభ తీర్మానం చేసింది కాబట్టి, పార్లమెంట్లో దీన్ని ప్రవేశపెట్టకూడదని సీమాంధ్ర నేతలు డిమాండ్ చేస్తున్నారు. మూజువాణి ఓటంటే ఏకగ్రీవ నిర్ణయంతో సమానం కాబట్టి, సభంతా సమైక్యవాదానికే కట్టుబడి ఉందని గుర్తించాలన్నారు మంత్రి ఆనం.

    సీఎం తీర్మానాన్ని సభలో నెగ్గించడం దుర్మార్గమంటూనే, చర్చ ముగిసినందుకు మాత్రం హర్షం వ్యక్తం చేశారు తెలంగాణ నేతలు. తమకు కావాల్సింది అసెంబ్లీలో ప్రక్రియ ముగియడమేనంటున్నారు. ఢిల్లీ దిగ్విజయ్ సింగ్ చేసిన కామెంట్లూ దీనికి తగ్గట్లే ఉన్నాయి. సీఎం తీర్మానంపై మాత్రమే సభ ఓటింగ్ నిర్వహించిందని, బిల్లుపై కాదంటూ ఆయన ప్రకటించారు. పైగా, ఆర్టికల్ 3 ప్రకారం కేంద్రానికి సంక్రమించిన అధికారాలకు ఈ తీర్మానం ఏమాత్రం విఘాతం కలిగించదన్నారాయన. ఫిబ్రవరి 4న జీవోఎం సమావేశంలో అసెంబ్లీ పంపించిన అభిప్రాయాలపై చర్చించే అవకాశం ఉంది. సభ సూచించిన సవరణల్లో సహేతుకమైన వాటిని బిల్లులో పొందుపరిచే అవకాశం ఉంది. ముఖ్యంగా ఈ పార్లమెంట్ సమావేశాల్లోనే బిల్లును ఆమోదించాలని భావిస్తున్న యూపీఏ సర్కార్కు బీజేపీ మద్దతు తప్పని సరి. అందుకే, బీజేపీ సూచిస్తున్న పోలవరానికి జాతీయ హోదా, పోలవరం ముంపు గ్రామాలను సీమాంధ్రలో చేర్చడం, సీమాంధ్ర రాజధానికి నిర్ధిష్టమైన నిధుల కేటాయింపును ప్రకటించే అవకాశం ఉంది.

    అసెంబ్లీ సమైక్య తీర్మానం చేయగలిగిన సీమాంధ్ర నేతలు, ఇప్పుడు దృష్టంతా ఢిల్లీపై పెట్టారు. పార్లమెంట్లోనూ బిల్లుపై చర్చ జరగకుండా అడ్డుకోవడానికి ఇప్పటినుంచే ప్రయత్నాలు చేస్తున్నారు.

Read more...

యూటీ మూగబోయే.. ప్రత్యేక రాష్ట్ర పాట మొదలయ్యే

రాష్ట్రాన్ని విభజిస్తే హైదరాబాద్ ను యూటీ చేయాల్సిందేనని, లేకపోతే విభజనకు అంగీకరించమని నానా హడావుడి చేసిన సీమాంధ్ర కేంద్ర మంత్రులు, హైకమాండ్ పట్టించుకోకపోయేసరికి కొత్తపాట మొదలుపెట్టారు. ఇవాళ సాయంత్రం జీవోఎం చివరి సమావేశం జరుగుతుండడంతో సరికొత్త ప్రతిపాదనను లేవనెత్తారు. పరిమితకాలం పాటు హైదరాబాద్ ను ప్రత్యేక రాష్ట్రంగా ప్రకటించాలని డిమాండ్ చేస్తున్నారు. కావూరి చాంబర్ లో సమావేశమై చర్చలు జరిపిన జేడీశీలం, పళ్లంరాజు, జీవోఎం భేటీకి ముందే షిండేను కలిసి ఈ విజ్ఞప్తి చేయాలని నిర్ణయించారు. అటు 69 పేజీల నివేదికను సిద్ధం చేసిన జీవోఎం ఇవాళ భేటీ అనంతరం, దాన్ని ప్రధానికి, కేబినెట్ కు పంపించనుంది. రాయలతెలంగాణ ఏర్పాటు దిశగానే నివేదిక సిద్ధమైనట్లు తెలుస్తోంది.

Read more...

సీమాంధ్రకు రాజధాని అదేనా..?

సమైక్యవాదులు వందరోజులకు పైగా ఆందోళనలు కొనసాగిస్తున్నా.. రాష్ట్ర విభజన ప్రక్రియ మాత్రం హస్తినలో చకచకా సాగిపోతోంది. ఓ వైపు రాష్ట్రాన్ని సమైక్యంగా ఉంచాలన్న డిమాండ్‌తో పోరాటం జరుగుతున్నప్పటికీ, రాష్ట్రం విడిపోతే రాజధాని ఎక్కడ ఏర్పాటు చేయాలన్నదానిపై జోరుగానే చర్చసాగుతోంది. ఉత్తరాంధ్రకు రాజధాని ఇవ్వాలంటూ కొంతమంది, గతంలో కర్నూలు రాజధాని కాబట్టి, మళ్లీ కర్నూలును రాజధాని చేయాలని సీమ నేతలు, మధ్యేమార్గం ఒంగోలును రాజధాని చేయాలంటూ ఇంకొంతమంది, బెజవాడే బెటర్ అంటూ మరికొంతమంది డిమాండ్లు చేస్తూ వస్తున్నారు. అయితే, తాజాగా కేంద్ర మంత్రుల బృందానికి సీమాంధ్ర కేంద్ర మంత్రులు ఇచ్చిన నివేదిక ప్రకారం రాజధాని ఎక్కడ ఏర్పాటు చేయాలన్న దానిపై కీలకమైన సిఫార్సులే చేసినట్లు తెలుస్తోంది.

జీవోఎంకు ఇచ్చిన నివేదికలో హైకోర్ట్ బెంచ్‌లను కర్నూలులోనూ, విశాఖలోనూ ఏర్పాటు చేయాలని విజ్ఞప్తి చేశారు. కొత్తరాజధానిలో హైకోర్ట్ ఏర్పాటవుతుంది కాబట్టి, వాటి బెంచ్‌లు మాత్రమే ఈ రెండు నగరాల్లో ఏర్పాటు చేయాలని కోరారు. అంటే, ఈ రెండింటినీ రాజధానిగా సీమాంధ్ర కేంద్రమంత్రులు కోరుకోవడం లేదన్నమాట. పైగా భౌగోళికంగా ఎన్నో ఇబ్బందులు ఈ రెండు ప్రాంతాలకు ఉన్నాయి. కర్నూలును రాజధాని చేస్తే, ఉత్తరాంధ్రకు దూరం అవుతుంది. ప్రతీదానికి కర్నూలు దాకా శ్రీకాకుళం, విజయనగరం,విశాఖ వాసులు రావడం కష్టం. పైగా కర్నూలుకు వరదముప్పు పొంచి ఉంటుంది. విమానాశ్రయం కూడా లేకపోవడం మరో మైనస్.  ఇక విశాఖను రాజధానిని చేస్తే, రాయలసీమ,నెల్లూరు వాసులకూ ఇదే పరిస్థితి ఎదురవుతుంది. విమానాశ్రయం ఉన్నప్పటికీ, తూర్పు నావికాదళ కేంద్రం కావడంతో ఎన్నో పరిమితులున్నాయి. పైగా గట్టిగా వర్షం పడితే ఎయిర్‌పోర్ట్‌లోకి నీళ్లొచ్చేస్తాయి. కాబట్టి వైజాగ్ కూ రాజధాని అర్హత లేదని తేల్చేసుకున్నారు సీమాంధ్ర కేంద్ర మంత్రులు.

వాన్‌పిక్ భూములు ఎక్కువగా ఉండడంతో కొత్తరాజధాని ప్రచారంలో ఒంగోలు పేరు బాగా ప్రచారం సాగుతున్నప్పటికీ, రాజధానికి అవసరమైన మౌలికసదుపాయాలు అక్కడ లేవంటున్నారు నిపుణులు. ఈ నేపథ్యంలో అందరి ఛాయిస్‌గా గన్నవరం-విజయవాడ-మంగళగిరి-గుంటూరు కారిడార్‌నే కొత్త రాజధానిగా ఏర్పాటు చేయాలన్న ప్రతిపాదన ఊపందుకొంటోంది. సీమాంధ్రకు దాదాపుగా మధ్యలో ఉండడం, విమానాశ్రయాన్ని విస్తరించే అవకాశాలుండడం, విశాలమైన భూభాగం, రోడ్,రైల్ కనెక్టివిటీ ఉండడంతో విజయవాడలో ఓటు పడిపోతోంది. అయితే రాజధానికి కొత్త పేరు పెడతారా లేక, విజయవాడ పేరునే ఉంచాతారా అన్నదే ఇప్పుడు చర్చనీయాంశమయ్యింది.

Read more...

జీవోఎంకు హోంశాఖ పంపించిన పూర్తి నోట్

రాష్ట్ర విభజన పై కేంద్ర హోంశాఖ పంపించిన కీలక నోట్ ను కింద ఉన్న లింక్ నుంచి డౌన్లోడ్ చేసుకుని చదువుకోవచ్చు. మొత్తం 85 పేజీలున్న ఈ నివేదికల రాష్ట్ర విభజనకు సంబంధించి తేల్చాల్సిన పలు అంశాలను హోంశాఖ పేర్కొంది.

హోంశాఖ పంపించిన నోట్  (డౌన్లోడ్ చేసుకోవడానికి ఈ లింకును క్లిక్ చేయండి)

Read more...

ఆ నాలుగూ తేల్చేస్తే విభజిచ్చేస్తాం..

రాష్ట్ర విభజన వ్యవహారంలో విప్పాల్సిన చిక్కుముడులపై కీలక నివేదికను మంత్రుల బృందానికి హోంశాఖ రహస్యంగా అందించింది. శ్రీకృష్ణ కమిటీతో పాటు, ఇతర మార్గాల ద్వారా సేకరించిన పూర్తి సమాచారాన్ని ఈ నివేదికలో పొందుపరిచారు. రాష్ట్ర విభజన విషయంలో తేల్చాల్సిన నాలుగు ప్రధాన అంశాలను గుర్తించిన హోంశాఖ వాటిని ఎలా పరిష్కరించాలో చెప్పమని మంత్రుల బృందాన్ని కోరింది. అవి, ఆర్టికల్ 371డి మరియు రాష్ట్రపతి ఉత్తర్వులు, జలవనరులు, విద్యుత్ వనరులు, హైదరాబాద్ సిటీ. విభజన విషయంలో ప్రధానమైన అభ్యంతరాలు వీటిపైనే వ్యక్తమవుతున్న నేపథ్యంలో కీలక నిర్ణయాన్ని తీసుకునే బాధ్యతను మంత్రుల బృందానికే అప్పజెప్పింది హోంశాఖ. మంత్రుల బృందం తీసుకునే నిర్ణయాల ఆధారంగానే విభజన ప్రక్రియలో ముందడుగు పడనుంది. ఇక పది జిల్లాలతో కూడిన తెలంగాణ ఏర్పాటుకు ప్రాథమికంగా అంగీకరించినప్పటికీ, దాన్నే అంతిమనిర్ణయంగా పరిగణించాల్సిన అవసరం కూడా లేదని మంత్రుల బృందానికి సంకేతాలిచ్చింది. దీంతో రాష్ట్ర విభజన ఏ రకంగా జరుగుతుందోనన్న ఆందోళన అందరిలోనూ మొదలయ్యింది. నవంబర్ 7వ తేదీన మూడోసారి సమావేశం కానున్న జీవోఎం ఈ నోట్ పై సవివరంగా చర్చించనుంది. జీవోఎంకు హోంశాఖ పంపించిన పూర్తినోట్ ను తదుపరి పోస్ట్ లో చూడొచ్చు.

Read more...

ఉనికికోసం చిరంజీవి ఆరాటం

హైదరాబాద్‌ను యూటీ చేయాలంటూ అధిష్టానం చుట్టూ కాళ్లరిగేలా తిరిగి, ఆ తర్వాత సీమాంధ్ర ఉద్యోగులంతో ఢిల్లీలో కూర్చోబెట్టే సరికి తలెక్కడ పెట్టుకోవాలో తెలియక సమైక్యాంధ్ర ఉద్యమ తెరపైనుంచి మాయమైన చిరంజీవి..మళ్లీ తన ఉనికిని చాటుకోవడానికి ఆరాటపడుతున్నారు. సమైక్యాంధ్ర తప్ప మరో ప్రత్యామ్నాయాన్ని ఒప్పుకునేది లేదంటూ ఢిల్లీలో మీడియా ముందు ఢంకా భజాయించారు మెగాస్టార్. తెలంగాణ తీర్మానం, బిల్లును అసెంబ్లీకి పంపించాలని డిమాండ్ చేశారు. విభజన వ్యవహారంలో కేంద్రం రాజ్యాంగ విరుద్ధంగా వెలుతుందన్న సీఎం వ్యాఖ్యలను సమర్థిస్తానన్నారాయన. అయితే, సమైక్యాంధ్ర ఉద్యమం ఉధృతంగా జరుగుతున్న సమయంలో ఒక్కరోజు కూడా బయటకు రాని చిరంజీవి, ఇప్పుడు హడావుడిగా స్టేట్‌మెంట్ ఇవ్వడంపై విమర్శలు వెల్లువెత్తుతున్నాయి.

Read more...