అక్కడ కిలో చికెన్ రూ.70 మాత్రమే!

ఓ వైపు నిత్యావసర ధరలు.. మరోవైపు చికెన్ ధరలు రోజురోజుకూ కొండెక్కుతుంటే... ఓ వ్యాపారి మాత్రం కేవలం రూ.70కే కిలో చికెన్ అమ్ముతూ సంచలనం సృష్టిస్తున్నాడు. మార్కెట్లో కిలో చికెన్ దాదాపు రూ.150కు అమ్ముతున్నా.. రంగారెడ్డి జిల్లా సూరారం కాలనీలోమాత్రం మహమ్మద్ తన దుకాణంలో స్పెషల్ కౌంటర్లు పెట్టాడు. స్కిన్ తో ఉన్న చికెన్ ను రూ.70కు, స్కిన్ లెస్ అయితే రూ.100కు అమ్మేస్తున్నాడు. ఈ విషయం తెలిసి.. జనం అంతా మహమూద్ షాపుకు ఎగబడ్డారు.
ఇలా సగం ధరకే చికెన్ అమ్మడానికి కారణం ఏమిటంటే.. చికెన్ వ్యాపారుల్లో మార్పు తేవడం కోసమేనట. సూరారం కాలనీలో చికెన్ వ్యాపారులంతా ఎవరికి ఇష్టం వచ్చిన ధరకు వాళ్లు అమ్ముతున్నారట. ఒకే ధరకు అమ్ముదామంటూ ఎన్ని సార్లు చెప్పినా ఎవరూ వినిపించుకోకపోవడంతో.. ఒళ్లు మండిన మహమూద్ ఇలా బంపర్ ఆఫర్ జనానికి ఇచ్చేశాడు. వ్యాపారులంతా కలిసికట్టుగా ఒకే రేటుకు అమ్ముతామని ఒప్పుకునే వరకూ.. కిలో చికెన్ 70 రూపాయలకే అమ్ముతానంటున్నాడు. మొత్తానికి వ్యాపారుల మధ్యపోటీ.. చికెన్ ప్రియులకు మాత్రం కడుపు నింపుతోంది.

Read more...

తొమ్మిదిన్నర చేరుకున్న బాలాపూర్ ప్రసాదం

గణేశ్ నిమజ్జనం అంటే ముందుగా అందరిదృష్టీ పడేది బాలాపూర్ లడ్డూపైనే. ఈ లడ్డూ కోసం సాగే వేలం పాటపై ప్రపంచం నలుమూలల ఉన్న తెలుగువాళ్లూ ఎంతో ఆసక్తిగా ఎదురుచూస్తుంటారు.  ఈ మహా ప్రసాదాన్ని దక్కించుకున్నవాళ్లకు ఎంతో కలిసివస్తుందన్న నమ్మకం ఏటా పెరుగుతున్నకొద్దీ.. లడ్డూ ధర కూడా పెరుగుతూ వస్తోంది. గత ఏడాది 9 లక్షల 26 వేల రూపాయలకు ఈ లడ్డూను సొంతం చేసుకున్న టీడీపీ నేత తీగల కృష్ణారెడ్డి, ఇటీవల జరిగిన ఎన్నికల్లో ఎమ్మెల్యేగా గెలిచారు. దీంతో, ఈ నమ్మకం మరింత ఎక్కువయ్యింది. దీంతో ఈ సారి కూడా లడ్డూవేలం పోటా పోటీగా మొదలయ్యింది.50 వేల రూపాయలతో మొదలైన వేలం పాట కొన్ని నిమిషాల్లోనే 9 లక్షలకు చేరుకుంది. చివరకు 9 లక్షల 50 వేల రూపాయలకు ఈ లడ్డూను సింగిరెడ్డి జైహింద్ రెడ్డి దక్కించుకున్నారు.

Read more...

రికార్డు కొట్టేసిన కేసీఆర్

తెలంగాణ తొలి ముఖ్యమంత్రిగా ప్రమాణ స్వీకారం చేసి చరిత్రలో ఎప్పటికీ నిలిచిపోయే రికార్డును తన ఖాతాలో వేసుకున్నారు టీఆర్ఎస్ అధినేత కేసీఆర్. ఉదయం 8 గంటల 15 నిమిషాలకు ముందుగా నిర్ణయించిన ముహూర్తం ప్రకారం కేసీఆర్ తో ప్రమాణ స్వీకారం చేయించారు గవర్నర నర్సింహన్. తెలంగాణ తొలి ముఖ్యమంత్రిగా దళితుడిని చేస్తానంటూ ఎన్నికలకు ముందు చాలాసార్లు చెప్పిన కేసీఆర్, తర్వాత మాత్రం మనసు మార్చుకున్నారు. ఎన్నికల ప్రచారంలో ఆ విషయం ప్రస్తావనకు రాకుండా జాగ్రత్త పడ్డారు. ఫలితాలతో టీఆర్ఎస్ కు స్పష్టమైన మెజార్టీ దక్కడంతో, ఆ పార్టీలోని దళిత నాయకుల చేతే, లేజిస్లెటివ్ పార్టీ లీడర్ గా కేసీఆర్ పేరును ప్రతిపాదింప జేశారు. ఇప్పుడు ప్రమాణ స్వీకారం చేసి అధికారికంగా ముఖ్యమంత్రి అయ్యారు కేసీఆర్. రాష్ట్ర విభజన నేపథ్యంలో కేసీఆర్ లాంటి బలమైన నేతే ముఖ్యమంత్రిగా ఉంటే.. తెలంగాణ ఆశించిన స్థాయిలో అభివృద్ధి చెందుతుందని, అందుకే ఆయన్ను ముఖ్యమంత్రిగా ఎన్నుకున్నామంటున్నాయి గులాబీ వర్గాలు. ఏదేమైనా, తెలంగాణ తొలి ముఖ్యమంత్రిగా అరుదైన రికార్డును తన సొంతం చేసుకున్నారు కేసీఆర్.

Read more...

తెలంగాణలో భారీగా పోలింగ్

తెలంగాణ తొలి ఎన్నికల్లో ఓటర్లు ప్రభంజనం సృష్టించారు. భారీగా పోలింగ్ కేంద్రాలకు తరలివచ్చి ఓటు హక్కును వినియోగించుకున్నారు ఓటర్లు. తెలంగాణ మొత్తం మీద చూస్తే 72 శాతం నమోదయ్యింది. పూర్తి వివరాలు అందితే ఇది మరింత పెరగవచ్చు. నల్గొండ 80.56 శాతంతో మొదటి స్థానాన్ని దక్కించుకోగా, తొలి గంట నుంచి వెనుకబడ్డ హైదరాబాద్ 53 శాతంతో చివరి స్థానంలో నిలబడింది.
జిల్లాల వారీగా చూస్తే
ఆదిలాబాద్ 78%
నిజామాబాద్ 70%
కరీంనగర్ 76.02%
మెదక్ 77%
రంగారెడ్డి 60%
హైదరాబాద్ 53%
మహబూబ్ నగర్  73%
నల్గొండ 80.56%
వరంగల్ 75%
ఖమ్మం 78%

భారీగా పోలింగ్ నమోదు కావడంతో, విజయం ఎవరిదన్న దానిపై భిన్నాభిప్రాయాలు వ్యక్తమవుతున్నాయి. ఏ పార్టీకి ఆ పార్టీ తమదే విజయం అంటూ బీరాలు పోతున్నాయి. అటు దేశవ్యాప్తంగానూ భారీగా పోలింగ్ నమోదయ్యింది. ఐదు రాష్ట్రాల్లో రికార్డు స్థాయిలో పోలింగ్ నమోదయ్యింది.

Read more...

దూసుకెళ్తున్న వరంగల్.. రేసులో వెనుకబడ్డ రాజధాని

తెలంగాణ ఎన్నికల్లో జోరుగా పోలింగ్ జరుగుతోంది. ఉదయం నుంచే పోలింగ్ కేంద్రాలకు చేరుకుంటున్న ఓటర్లు తమ ఓటుహక్కును వినియోగించుకుంటున్నారు. కొన్ని చోట్ల ఈవీఎం లు మొరాయించడం తప్పితే, ప్రశాంతంగా పోలింగ్ కొనసాగుతోంది. ఉదయం 11 గంటల సమయానికి..వరంగల్లో అత్యధికంగా పోలింగ్ శాతం నమోదయ్యింది. జిల్లాల వారీగా చూస్తే,
వరంగల్ 37.34%
నిజామాబాద్ 37.50%
ఖమ్మం 36.97%
మహబూబ్‌నగర్ 35.71%
మెదక్ 34.33%
ఆదిలాబాద్ 33.96%
కరీంనగర్31.96%


నల్గొండ 23.30%

రంగారెడ్డి 26%
హైదరాబాద్ 18.03%

Read more...

చిరూ.. ఫేస్ టర్నింగ్ ఇచ్చుకో..!

హైదరాబాద్ లో ఓటు హక్కు వినియోగించుకోవడానికి వెళ్లిన చిరంజీవికి షాక్ ఇచ్చారు జూబ్లీహిల్స్ ఓటర్లు. కేంద్రమంత్రిననో, వీవీఐపీననో గానీ చిరంజీవి నేరుగా పోలింగ్ బూత్ లోకి వెళ్లిపోయారు. దీంతో , అప్పటికే అక్కడ క్యూలో ఉన్న ఓటర్లకు ఒళ్లుమండి ఆయన్ను వెనక్కు పిలిచారు. క్యూలో ఉండి ఓటేయాల్సిందేనని తేల్చిచెప్పారు. దీంతో చేసేదేమీ లేక.. ఆయన క్యూలో నిలబడ్డారు.ఈ విషయం మీడియాలో జోరుగా ప్రసారం కావడంతో, ఓటేసిన అనంతరం వివరణ ఇచ్చారు చిరంజీవి. తన ఓటు ఉందో లేదో తెలుసుకుందామన్న ఉద్దేశంతోనే లోపలికి వెళ్లానే తప్ప, నిబంధనలను ఉల్లంఘించాలన్న ఉద్దేశం తనకు లేదన్నారాయన. గతంలో కర్నాటక ఎన్నికల్లోనూ బీజేపీ సీనియర్ నేత వెంకయ్యనాయుడికీ ఇలాంటి పరిస్థితే ఎదురయ్యింది.

Read more...

హైదరాబాద్ వెనుకబడింది..

తెలంగాణ చరిత్రలో అత్యంత కీలకంగా భావిస్తున్న ఎన్నికల్లో పోలింగ్ మొదలయ్యంది.119 అసెంబ్లీ, 17 లోక్ సభ స్థానాలకు జరుగుతున్న పోలింగ్ లో ఓటర్లు తమ ఓటు హక్కును వినియోగించుకుంటున్నారు.ఉదయం 9గంటల సమయానికి దాదాపు 15 శాతం పోలింగ్ నమోదయ్యింది. మహబూబ్ నగర్లో అత్యధికంగా 17 శాతం నమోదు కాగా హైదరాబాద్ లో మాత్రం కేవలం 10 శాతమే నమోదు కావడం గమనార్హం. చదువుకున్న వాళ్లు ఎక్కువగా ఉండే రాష్ట్రరాజధానిలో అత్యంత తక్కువ పోలింగ్ నమోదు కావడం నిజంగానే సిగ్గు చేటు.

Read more...

యూటీ మూగబోయే.. ప్రత్యేక రాష్ట్ర పాట మొదలయ్యే

రాష్ట్రాన్ని విభజిస్తే హైదరాబాద్ ను యూటీ చేయాల్సిందేనని, లేకపోతే విభజనకు అంగీకరించమని నానా హడావుడి చేసిన సీమాంధ్ర కేంద్ర మంత్రులు, హైకమాండ్ పట్టించుకోకపోయేసరికి కొత్తపాట మొదలుపెట్టారు. ఇవాళ సాయంత్రం జీవోఎం చివరి సమావేశం జరుగుతుండడంతో సరికొత్త ప్రతిపాదనను లేవనెత్తారు. పరిమితకాలం పాటు హైదరాబాద్ ను ప్రత్యేక రాష్ట్రంగా ప్రకటించాలని డిమాండ్ చేస్తున్నారు. కావూరి చాంబర్ లో సమావేశమై చర్చలు జరిపిన జేడీశీలం, పళ్లంరాజు, జీవోఎం భేటీకి ముందే షిండేను కలిసి ఈ విజ్ఞప్తి చేయాలని నిర్ణయించారు. అటు 69 పేజీల నివేదికను సిద్ధం చేసిన జీవోఎం ఇవాళ భేటీ అనంతరం, దాన్ని ప్రధానికి, కేబినెట్ కు పంపించనుంది. రాయలతెలంగాణ ఏర్పాటు దిశగానే నివేదిక సిద్ధమైనట్లు తెలుస్తోంది.

Read more...

అభయ కేసులో అసలు దోషులెవరు?

ఢిల్లీలో నిర్భయ కేసు తరహాలోనే హైదరాబాద్‌లో జరిగిన అభయ అత్యాచార ఘటన, భాగ్యనగరంలో మహిళల భద్రతను మరోసారి ప్రశ్నార్థకంగా మార్చింది. జనసమ్మర్థం ఉన్న ప్రాంతం నుంచే అభయను క్యాబ్‌ పేరుతో కారులో ఎక్కించుకుని నగర శివార్లకు తీసుకువెళ్లి అత్యంత అమానవీయంగా సామూహిక అత్యాచారానికి పాల్పడ్డ తీరు చూస్తే, మృగాళ్లు ఎంతకు తెగించారో అర్థం చేసుకోవచ్చు. అమ్మాయిలు రేప్ చేస్తే పోలీసులకు చెప్పుకోరని, ఒకవేళ చెప్పుకున్నా, తమను పట్టుకోలేరన్న ధీమాతో నిందితులు ఉండడం మన వ్యవస్థాగత లోపాలను బయటపెడుతోంది. ఇంతటి ఘాతుకానికి ఒడిగట్టిన దుర్మార్గులను అత్యంత దారుణంగా శిక్షించాలి.

ఇక ఈ ఘటన జరగడం వెనుక లోపాలను పరిశీలిస్తే, ఎన్నో కనిపిస్తాయి. ఢిల్లీలో నిర్భయ కేసు జరిగిన తర్వాత, ఐటీ ఆఫీసులు, కాల్ సెంటర్లు ఎక్కువగా ఉన్న  సైబరాబాద్ పరిధిలో సీసీ కెమెరాలు భారీగా అమర్చామని, నిర్బయలాంటి ఘటనలు తమ పరిధిలో జరగవని అప్పటి పోలీస్ కమిషనర్ ద్వారకా తిరుమల నాథ్ ప్రకటించారు. కానీ, అదంతా వట్టిమాటలేనని తాజా ఘటనతో తేలిపోయింది. ఎందుకంటే, మాదాపూర్ నుంచి కొల్లూరు వెళ్లేదాకా ఒక్క సీసీ కెమెరా కూడా కారును రికార్డ్ చేయలేకపోయింది. ఇంత దారుణంగా సీసీ కెమెరాల పనితీరు ఉన్నా మన పోలీసులు పట్టించుకోవడం లేదు. అదృష్టవశాత్తూ బిర్లా స్కూల్ దగ్గర సీసీ కెమెరా పనిచేసింది కాబట్టి ఈ కేసులో చిక్కుముడి చాలావరకూ వీడిపోయింది. ఒకవేళ అక్కడ కెమెరా లేకపోతే పరిస్థితి ఏమిటి.. ఈ నిందితులు దొరికేవారా..? ఒకవేళ దొరకకపోతే మాత్రం, ఇదే తరహాలో మరెంతోమంది యువతుల జీవితాలతో చెలగాటమాడేవారన్నది ఎవరూ కాదనలేని సత్యం. ఈ కేసును పోలీసులు త్వరగా ఛేదించినప్పటికీ, వారి నిర్లక్ష్యం వల్లే ఇంత దారుణం చోటుచేసుకుందన్నది అందరూ గుర్తించాల్సిన విషయం.

ఇక త్వరగా హాస్టల్‌కు వెళ్లాలన్న తపనలో ప్రైవేట్ కార్‌లో ఎక్కడం కూడా అభయ తప్పే. నిర్భయ లాంటి ఘటనలు జరిగిన తర్వాత కూడా, ఒక్కసారి కూడా ఆమె ఆలోచించకపోవడం వల్లే ఈ దారుణం జరిగింది. కారులో ఎక్కకుండా బస్సు కోసమో, షేర్ ఆటో కోసమో కనీసం మరో పదినిమిషాలు వేచి ఉన్నా సరిపోయింది. ఒంటరిగా వెళ్లాల్సి వచ్చిప్పుడు వీలైనంతవరకూ బస్టాండ్‌ల దగ్గరకు వచ్చి ఎక్కించుకునే క్యాబ్‌లను ఆశ్రయించకపోవడమే మంచింది. ఇద్దరు ముగ్గురు ఉంటేనే ఇలాంటి వాహనాలను ఎంచుకోవాలి.

అమ్మాయిల భద్రత కోసం మనవాళ్లు కొంతకాలం ఆండ్రాయిడ్ ఆప్‌ను తయారు చేశారు. దాన్ని డౌన్‌లోడ్ చేసుకుని ఉంచుకోవడం మంచిది. ఇక పెప్పర్‌ స్పే లాంటివి అమ్మాయిలు బ్యాగ్‌లో ఎప్పుడూ సిద్ధంగా ఉంచుకోవాలి. తాము ప్రయాణిస్తున్న వాహనం దారి మళ్లిందని గుర్తించగానే డ్రైవర్‌ను నిలదీయాలి. అతనిచ్చిన సమాధానం సరిగా లేకపోతే మాత్రం వెంటనే పోలీస్ కంట్రోల్ రూమ్ 100కు డయల్ చేయాలి.  ఒకవేళ ఫోన్ చేసే పరిస్థితులు లేకపోతే, మేసేజ్ పంపించినా చాలు.

ఔటర్ రింగ్‌రోడ్డు టోల్‌గేట్ల దగ్గర కూడా పోలీస్‌లను డ్యూటీలో ఉంచాల్సిన అవసరం ఉంది. కార్లలో అనుమానాస్పదంగా ఉన్నవాళ్ల వివరాలను అడిగి తెలుసుకోవాల్సిన బాధ్యత పోలీసులపై ఉంది.

మగాళ్లు కూడా ఈ విషయంలో మారాల్సిన అవసరం ఉంది. ఆడవాళ్లపై లైగింక దాడులు చేయాలన్న దురాలోచనను మానుకోవాలి.

Read more...

శీలానికి చుక్కెదురు

రాష్ట్ర విభజన వ్యవహారంలో కేంద్రమంత్రుల ఓ స్పష్టతకు వచ్చినట్లు కనిపిస్తున్నారు. రాష్ట్రాన్ని సమైక్యంగా ఉంచాలన్న డిమాండ్‌ను క్రమంగా పక్కన పెడుతూ, విభజన తర్వాత సీమాంధ్ర కోసం ఏం చేయాలన్న డిమాండ్లను తెరపైకి తెస్తున్నారు. అందులో భాగంగానే విజయవాడలో మీడియాతో మాట్లాడిన కేంద్రమంత్రి జేడీ శీలం, హైదరాబాద్‌ను యూటీ చేస్తే సీమాంధ్రుల ఆందోళన తగ్గుతుందన్నారు. ప్రస్తుతం ఉన్న పరిస్థితుల్లో ఎంపీలు, ఎమ్మెల్యేలు రాజీనామాలు చేయకూడదని, సోనియా గాంధీని మెప్పించి, ఒప్పించి సీమాంధ్ర ప్రయోజనాలను కాపాడేందుకు కృషి చేయాలన్నారాయన.

విజయవాడ వచ్చిన జేడీ శీలాన్ని సమైక్యవాదులు అడ్డగించారు. ఓ స్టార్ హోటల్లో ప్రెస్‌మీట్‌కు శీలం ఏర్పాట్లు చేసుకోగా, అదే జరిగితే హోటల్‌పై దాడి చేస్తామంటూ హెచ్చరించారు. ఈ నేపథ్యంలో, హోటల్ యజమాన్యం ప్రెస్‌మీట్‌కు అనుమతించలేదు. దీంతో హోటల్‌ బయటే మీడియాతో మాట్లాడారు శీలం. మీడియాతో మాట్లాడుతున్న సమయంలోనూ సమైక్య ఉద్యమకారులు మంత్రి రాజీనామా చేయాలంటూ నినాదాలు చేయడంతో ఆయన అసహనానికి గురయ్యారు.

Read more...

విశ్వాస ఘాతుకం

నమ్మకం నట్టేటమునిగింది
అగ్నిసాక్షిగా చేపట్టిన బంధమే అంతం చేసింది
వందేళ్లనుకున్న జీవితం
వందరోజులకే ముగిసిపోయేలా చేసింది
కట్టుకున్న భార్యే కడతేర్చింది

అనుకున్నదే అయ్యింది. అనుమానం నిజమయ్యింది. సెప్టెంబర్ 14న సంఘీ టెంపుల్ నుంచి వస్తున్న భార్యభర్తలపై దుండగులు దాడి చేశారని, ఈ దాడిలో భర్త వెంకటేశ్వరరావు హతమయ్యాడని, భార్య సౌజన్యకు తీవ్ర గాయాలు అయ్యాయన్న వార్త హైదరాబాద్ లో తీవ్ర కలకలం పుట్టించింది. అయితే, ఈ దాడి జరిగిన తీరుపై అప్పట్లోనే ఎన్నో అనుమానాలయ్యాయి. దీనిపై లోతుగా దర్యాప్తు చేసిన పోలీసులు చివరకు భార్య, ఆమె ప్రియుడు కలిసి ఈ హత్య చేసినట్లుగా తేల్చారు.

    వెంకటేశ్వరరావు ఆర్టీసీలో మెకానిక్ గా పనిచేస్తుండగా, సౌజన్య బెంగళూరులో సాఫ్ట్ వేర్ ఇంజనీర్ గా పనిచేస్తోంది. , వీరిద్దరికీ మే 29న వివాహం జరిగింది. పెళ్లి తర్వాత సౌజన్య బెంగళూరుకు వెళ్లిపోయింది, వెంకటేశ్వరరావు ఉద్యోగం రీత్యా ఇక్కడే ఉంటున్నాడు. వారాంతాల్లో హైదరాబాద్ కు వస్తూ వెళుతోంది సౌజన్య. కానీ, ఈ పెళ్లంటే ఆమెకు ఇష్టంలేదు. అంతకు ముందే ఆమె మరొకరిని ప్రేమించింది. అతడితో కలిసి వెంకటేశ్వరరావును అడ్డుతొలగించుకోవాలని పన్నాగం పన్నింది. ప్లాన్ ప్రకారం భర్తను సంఘీటెంపుల్ కు తీసుకువెళ్లింది. తిరిగి వచ్చే దారిలో ఎవరూ లేని చోట దాడి చేయించింది. ఎవరికీ అనుమానం రాకుండా ఉండడం కోసం తన చేతులూ కోసుకుంది. కానీ, కాల్ రికార్డులు అసలు దొంగను పట్టించాయి.

వెంకటేశ్వరరావు అడ్డు తొలిగితే సౌజన్య నచ్చినవాడిని పెళ్లిచేసుకోవచ్చు.. కానీ, అతన్ని హత్య చేస్తే, తాను హంతకురాలై జైలు గోడల మధ్య బతకాల్సి వస్తుంది. సాఫ్ట్ వేర్ ఇంజనీర్ అయినా, ఈ చిన్న లాజిక్ మిస్ అయ్యింది. హత్యకు బదులు వెంకటేశ్వరరావుకే అసలు విషయం చెబితే, ఈ కథ మరోలా ఉండేదేమో..

Read more...

రేపు ఏమవుతుందో?

ఏపీఎన్జీవోలు తలపెట్టిన సేవ్ ఆంధ్ర ప్రదేశ్ సభ నేపథ్యంలో హైదరాబాద్లో హైటెన్షన్ ఏర్పడింది. కేవలం ఉద్యోగులకు మాత్రమే అనుమతి ఇవ్వాలని హైకోర్ట్ స్పష్టంగా చెప్పినప్పటికీ, ఉద్యోగేతర వర్గాలు సీమాంధ్రలోని 13 జిల్లాల నుంచి పెద్ద ఎత్తున తరలివస్తున్నారు. పోలీసులు కూడా ఉద్యోగులకు మాత్రమే అనుమతిస్తామని చెప్పినప్పటికీ, వీరంతా రావడం ఉద్రిక్తతలను సృష్టించేలా కనిపిస్తోంది. సమైక్యాంధ్ర కోసం చేస్తున్న సభ కన్నా, సీమాంధ్రుల బలాన్ని హైదరాబాద్ లో చూపించాలన్న భావన బలపడడంతో, పెద్ద ఎత్తున సమైక్యవాదులు తరలివస్తున్నట్లు స్పష్టంగా కనిపిస్తోంది. గతంలో హైదరాబాద్ లో మిలియన్ మార్చ్, సాగర హారాలకు అనుమతి ఇవ్వకుండా చివరిదాకా లాక్కొచ్చి, చివరకు హైకోర్ట్ అనుమతి ఇచ్చినా జిల్లాల సరిహద్దుల్లో భారీగా చెక్ పోస్టులు ఏర్పాటు చేసి ఎక్కడికక్కడ అరెస్టులు చేసిన పోలీసులు, ఈ సారి మాత్రం పూర్తి భిన్నంగా వ్యవహరిస్తున్నారు. ఉద్యోగేతర వర్గాలు భారీగా హైదరాబాద్ కు వస్తున్నా ఎక్కడా అడ్డుకునే ప్రయత్నం చేయడం లేదు. వస్తున్న తెలంగాణను అడ్డుకుంటున్నారన్న ఆగ్రహంతో ఉన్న తెలంగాణ వాదులకు, ఈ చర్య మరింత రెచ్చగొట్టేలానే కనిపిస్తోంది. ఇప్పటికే ఈ సభను అడ్డుకుంటామని విద్యార్థి సంఘాలు, ఎంఆర్పీఎస్ ప్రకటించడంతో రేపు హైదరాబాద్లో ఏం జరుగుతుందోనన్న టెన్షన్ అందరిలోనూ వ్యక్తమవుతోంది. ఏపీఎన్జీవోలు నిర్వహిస్తున్న సభను బలప్రదర్శనగా మార్చకుండా, కేవలం ఉద్యోగులు మాత్రమే పాల్గొనేలా చేస్తే శాంతియుత వాతావరణం నెలకొనే అవకాశాలున్నాయి. అందర్నీ హైదరాబాద్ సభకు అనుమతిస్తే, పరిస్థితులు అదుపు తప్పే అవకాశాలే ఎక్కువ.

Read more...

ఇదెక్కడి న్యాయం.. ?

ఈ ఫోటో ఫేస్ బుక్ లో తెగ తిరుగుతోంది. ఫోటోలో విషయం కరెక్ట్ కాదు గానీ, దానికి ఉపయోగించిన టైటిల్ మాత్రం కరెక్టే. ఎందుకంటే, 1956 నాటికి హైదరాబాద్ ఏదీ లేదని, మొక్కనాటి, నీళ్లు పోసి పెంచి పెద్దది చేస్తే తెలంగాణవాళ్లే ఫలాలన్నీ తింటున్నారని చెబుతుంది. ఇదెక్కడి న్యాయం.. రాష్ట్రం విలీనం అయ్యేనాటికి హైదరాబాద్ లాంటి నగరం ఉమ్మడి రాజధానిలో ఎక్కడా లేదు. అసెంబ్లీ భవనం ఉంది, కోర్టు బిల్డింగ్ లు ఉన్నాయి, ప్రభుత్వ కార్యాలయాలకు ఉపయోగపడే వందలాది భవనాలు సిద్ధంగా ఉన్నాయి, స్టేడియాలున్నాయి, పార్క్ లు ఉన్నాయి.. ఇక నిజాం పెట్టిన ఎన్నో కంపెనీలున్నాయి.

చార్మినార్

నిజాం ఏర్పాటు చేసిన నిజాం రోడ్ ట్రాన్స్ పోర్టే ఆ తర్వాత ఏపీఎస్ ఆర్టీసీగా మారిందన్న విషయం అందరికీ తెలిసిందే. నిజాం రైల్వేస్ సెంట్రల్ రైల్వేలో భాగంగా, ఆ తర్వాత దక్షిణ మధ్య రైల్వేగా మారిందన్నవిషయాన్ని అంతా గుర్తుచేసుకుంటే మంచిది.  నిజాం హాయంలో సనత్ నగర్ ప్రాంతం పారిశ్రామికకేంద్రంగా అభివృద్ధి చెందింది.

ఉస్మానియా హాస్పిటల్

ఆల్విన్ మెటల్ వర్క్స్ (ఆల్విన్ వాచెస్, ఆల్విన్ రిఫ్రిజిరేటర్స్, ఆల్విన్ మోటర్స్), నిజాం షుగర్స్ (ఆసియాలోనే ఒకప్పుడు అతిపెద్ద షుగర్ ఫ్యాక్టరీ), సిర్పూర్ పేపర్ మిల్స్ (ఆదిలాబాద్)  ప్రాగా టూల్స్,  ఆజంజాహీ మిల్స్ (వరంగల్), వజీల్ సుల్తాన్ టొబాకో కంపెనీ, హైదరాబాద్ ఆస్బెస్టాస్, హైదరాబాద్ ఇండస్ట్రీస్ సింగరేణి కోల్ మైన్స్, ఉస్మానియా యూనివర్సిటీ, నిజాం కాలేజ్, సిటీ కాలేజ్, ఉస్మానియా హాస్పిటల్, సికింద్రాబాద్, నాంపల్లి, కాచిగూడ రైల్వే స్టేషన్లలాంటివి   ఎన్నో హైదరాబాద్ రాష్ట్రంలో ఉన్నాయి. ఇంతగా అభివృద్ధి చెందిన ప్రాతంలో అప్పట్లో భారతదేశంలోనే లేదని చెప్పడంలో ఏ మాత్రం అతిశయోక్తి లేదు.

నాంపల్లి రైల్వే స్టేషన్

ఆల్విన్ రిఫ్రిజిరేటర్ ఒకప్పుడు దేశంలోనే అత్యధికంగా అమ్ముడైన ఫ్రిజ్. 1952 సాధారణ ఎన్నికల్లో ఉపయోగించిన బ్యాలెట్ బాక్సుల్లో ఎక్కువగా తయారు చేసింది కూడా ఆల్వినే.  హైదరాబాద్, ఆంధ్ర విలీనమయ్యి ఆంధ్రప్రదేశ్ అవతరించిన తర్వాత ఈ కంపెనీలన్నీ కనుమరుగైపోయాయి. నష్టాల పేరుతో, ఒక్కొక్కదాన్నే ప్రభుత్వాలు తెగనమ్ముతూ వచ్చాయి.
    ఇక కేంద్ర ప్రభుత్వ సంస్థలు చాలావరకూ హైదరాబాద్ లోనే ఏర్పాటు కావడానికి ప్రత్యేక కారణం ఉంది. సముద్ర తీరానికి దూరంగా ఉండడం, మనకు శత్రువులైన పాకిస్తాన్, చైనాలకు సుదూర ప్రాతంలో ఉండడం వల్లే ఆర్డినెన్స్ ఫ్యాక్టరీ, బీడీఎల్, హెచ్ఏఎల్ లాంటి రక్షణరంగ సంస్థలు హైదరాబాద్లో ఏర్పాటయ్యాయి.

మొజంజాహీ మార్కెట్

    కర్నూలు రాజధానిగా ఎలాంటి భవనాలు, ఎలాంటి మౌలిక సదుపాయాలు లేని స్థితిలో హైదరాబాద్ కు రాజధాని తరలిందే తప్ప, హైదరాబాద్ ను అభివృద్ధి చేద్దామన్న ఉద్దేశంతో మాత్రం కాదని ఖచ్చితంగా చెప్పొచ్చు. అయితే, రాష్ట్రానికి రాజధాని కావడం, పరిపాలనాపరమైన సౌలభ్య ఉండడంతో ఆ తర్వాత చాలా కంపెనీలు హైదరాబాద్ చుట్టుపక్కల విస్తరించాయి. దీనివల్ల ఎక్కువగా లబ్దిపొందింది కూడా సీమాంధ్ర వ్యాపారవేత్తలే. ఆంధ్రప్రదేశ్ హయాంలో ఐటీ, రియల్ ఎస్టేట్ రంగాలు హైదరాబాద్ లో బాగా అభివృద్ధి చెందాయి.  ఫిల్మ్ ఇండస్ట్రీ మద్రాస్ నుంచి తరలివచ్చింది. కొన్ని ఫీలింగ్స్ చాలామందిలో బలంగా ఉంటాయి హైదరాబాద్లో హైటెక్ సిటీ కట్టింది మేమే ( ఈ పేరుతో ఫేమస్ అయిన బిల్డింగ్ ఎల్ అండ్ టీ వాళ్ల ప్రైవేట్ ప్రాపర్టీ, ఈ ప్రాంతంలో ఉన్న కంపెనీలన్నీ ప్రైవేటు కంపెనీలే. పైగా, వీటి కోసం భూములు కోల్పోయింది మాత్రం తెలంగాణ ప్రజలు),

నిజాం ఎయిర్ పోర్ట్

 ఇంటర్నేషనల్ ఎయిర్ పోర్ట్ కట్టింది మేమే ( జీఎంఆర్ ప్రైవేట్ ప్రాపర్టీ, పైగా, బేగంపేటలో ఉన్న ప్రభుత్వ ఎయిర్ పోర్ట్ ను మూసేసి మరీ జీఎంఆర్ కు పర్మిషన్ ఇచ్చారు. దీని వల్ల యూజర్ ఛార్జీల పేరుతో ప్రయాణీకులు ప్రతి జర్నీకి భారీగా డబ్బులు కట్టాల్సి వస్తోంది. )
ట్యాంక్ బండ్ కట్టించింది ఎన్టీఆరే.. (ఈ ట్యాంక్ బండ్ ఎప్పటి నుంచో ఉంది, ఎన్టీఆర్ చేసిందల్లా సాగర్లో బుద్ధ విగ్రహం పెట్టించడం, ట్యాంక్ బండ్ పై తెలుగువాళ్ల విగ్రహాలు పెట్టించడం మాత్రమే)

పరేడ్ గ్రౌండ్స్

    1956 నాటికే ఎంతో అభివృద్ధి చెందిన హైదరాబాద్, ఆంధ్రప్రదేశ్ లో కలిసినా కలవకపోయినా, ఈ మాత్రం అభివృద్ధి చెందేది. దీన్ని కేవలం సీమాంధ్ర ప్రజల గొప్పతనంగానే చెప్పుకోవాల్సిన అవసరం లేదు. అయితే, ఇక్కడ బాధపడాల్సిన విషయం ఏమిటంటే, ఈ యాభై ఏళ్ల కాలంలో విశాఖ మినహా, మిగిలిన ఏ నగరమూ (అటు సీమాంధ్ర, ఇటు తెలంగాణలో ) అభివృద్ధి చెందకపోవడం, ఆ దిశగా చర్యలు తీసుకోకపోవడం నిజంగా పాలకుల అసమర్థతే. దానివల్లే ఇప్పుడు ఇన్ని సమస్యలు. హైదరాబాద్ ను మేము మాత్రమే అభివృద్ధి చేశామని చెప్పుకునే వాళ్లు.. ఒక్కసారి చరిత్రతను తిరగేస్తే మంచింది.  ఒక్కమాటలో చెప్పాలంటే, ఫలాలిచ్చే చెట్టుకు సీమాంధ్రులు కాస్త ఎరువు వేశారు.. అది మరిన్ని ఫలాలను ఇచ్చింది. వాటినీ ఇంతకాలం సీమాంధ్ర ప్రజలు సంతోషంగానే తిన్నారు. అంతేకాని, మొక్కను నాటి, దానికి నీళ్లుపోసి, కాయలు కాసేలా చేసి, వాటిని కేవలం తెలంగాణకే వదిలేస్తామని అభిప్రాయపడడం మాత్రం పూర్తిగా అవివేకం.

లోయర్ ట్యాంక్ బండ్

Read more...

బ్రేకింగ్ న్యూస్: హైదరాబాద్ లో బాంబు పేలుళ్లు.. 20 మందికి పైగా మృతి

అత్యంత రద్దీగా ఉండే దిల్ సుఖ్ నగర్ ప్రాంతంలో ఐదు చోట్ల బాంబు పేలుళ్లు సంభవించాయి. ఈ పేలుళ్లలో దాదాపు 20మంది చనిపోయి ఉండొచ్చని తెలుస్తోంది. 50 మందికి పైగా గాయాలయ్యాయి. దిల్ సుఖ్ నగర్ బస్టాండ్ కు ఎదురుగా ఉన్న వెంకటాద్రి, కోణార్క్ థియేటర్, ఫుట్ ఓవర్ బ్రిడ్జ్, ఆనంద్ టిఫిన్ సెంటర్ ల దగ్గర రాత్రి 7 గంటల నుంచి 7 గంటల 7 నిమిషాల మధ్య బాంబులు ఒక్కసారిగా బాంబుల పేలాయి. పేలుళ్ల శబ్ధం విని జనం భయాందోళనలకు గురయ్యారు. తలోదిక్కూ పరుగులు తీయడంతో తొక్కిసలాట జరిగింది. ఈ ఘటనలోనూ చాలా మంది గాయపడ్డారు. దీంతో రాష్ట్ర వ్యాప్తంగా హైఅలర్ట్ ప్రకటించారు పోలీసులు. భారీగా తనిఖీలు నిర్వహిస్తున్నారు. పేలుళ్లపై కేంద్ర హోంమంత్రి షిండే ఎప్పటికప్పుడు వివరాలు తెలుసుకుంటున్నారు.

Read more...

టీజేఏసీ సమరదీక్షకు సర్కార్ రెడ్ సిగ్నల్

అఖిలపక్షంలో ప్రకటించినట్లు ఈనెల 28న తెలంగాణపై ప్రకటన చేసేలా, కేంద్రంపై ఒత్తిడి తేవడానికి తెలంగాణ రాజకీయ జేఏసీ రేపటినుంచి తలపెట్టిన సమరదీక్షకు ప్రభుత్వం అనుమతి ఇవ్వలేదు. దీంతో, కేసీఆర్ తో జేఏసీ ఛైర్మన్ కోదండరామ్, ఉద్యోగ సంఘాల నేతలు సమావేశమై చర్చలు జరిపారు. అనంతరం హోంమంత్రిని కలిసి అనుమతి ఇవ్వాలని కోరారు. దీనిపై ప్రభుత్వం నుంచి సానుకూల స్పందన రాలేదు. దీంతో, ప్రభుత్వం అనుమతి ఇవ్వకున్నా, ఇందిరాపార్క్ దగ్గర ముందుగా అనుకున్నట్లే 36 గంటల సమరదీక్ష చేస్తామని టీజేఏసీ ప్రకటించింది. ఒక్కచోట దీక్ష చేస్తామంటే అనుమతి ఇవ్వనన్న కారణంగా, తెలంగాణ అంతటా దీక్షలు, ధర్నాలు చేపట్టాలని పిలుపునిచ్చింది. సమైక్యవాదుల ర్యాలీలకు, సభలకు అనుమతులు ఇస్తున్న ప్రభుత్వం తెలంగాణ సభలకు అనుమతి ఇవ్వకుండా కక్షపూరితంగా వ్యవహరిస్తోందని కోదండరామ్ విమర్శించారు. సమరదీక్ష చేస్తామని టీ జేఏసీ ప్రకటించిన నేపథ్యంలో ఆదివారం హైదరాబాద్ లో ఉద్రిక్త పరిస్థితులు తలెత్తే అవకాశాలు కనిపిస్తున్నాయి.

Read more...

తెలంగాణాకే మద్దతన్న దానం

తెలంగాణ ఉద్యమానికి ఇంతకాలం దూరంగా ఉంటూ వచ్చిన హైదరాబాద్ మంత్రి దానం నాగేందర్ మనసు మార్చుకున్నట్లే కనిపిస్తోంది. తెలంగాణకు వ్యతిరేకమని తానెప్పుడూ అనలేదంటూ తాజాగా ప్రకటన చేశారాయన. త్వరలోనే తెలంగాణకు అనుకూలంగా నిర్ణయం వస్తుందన్నారు. హైదరాబాద్ ను కేంద్ర పాలిత ప్రాంతంగా చేయకూడదనే తమ డిమాండ్ అన్నారు. లగడపాటి లాంటి నేతలు చేస్తున్న ప్రకటనలతో తెలంగాణ ఉద్యమం మరింత బలపడిందన్నారు దానం. తాను తెలంగాణకు వ్యతిరేకమని ఎవరైనా నిరూపిస్తే, రాజకీయాల నుంచి తప్పుకుంటానని సవాల్ విసిరారు మంత్రి దానం నాగేందర్. దానం ప్రకటనతో తెలంగాణవాదుల్లో మరింత జోష్ వచ్చేలా కనిపిస్తోంది.

Read more...

హైదరాబాద్లో సొరంగం నిజమే

హైదరాబాద్ బిర్లామందిర్ సమీపంలోని విద్యారణ్య స్కూల్ ఆవరణలో నిధులున్నాయంటూ హడావుడిగా తవ్వకాలు చేపట్టిన పురావస్తు శాఖకు ఎట్టకేలకు సానుకూల ఫలితం దక్కింది. ఎలాంటి నిర్ధారణ చేసుకోకుండా తవ్వకాలు మొదలుపెట్టడంపై ఎన్నో విమర్శలు వెల్లువెత్తాయి. దీనికి తోడు జేసీబీని ఉపయోగించి మట్టిని తొలగించడం.. కొంతమంది మాటలను నమ్మి పనులు చేయడంపై ఆరోపణలు కూడా వచ్చాయి. పైగా పదిహేను రోజుల పాటు తవ్వకాలు జరిగినా నేలమాలిగకు సంబంధించి చిన్న ఆధారాన్ని కూడా పురావస్తు శాఖ కనిపెట్టలేకపోయింది. దీంతో.. ప్రభుత్వరంగ సంస్థ ఎన్ ఎం డీసీని రంగంలోకి దించి, శాస్త్రీయ పద్దతుల్లో అన్వేషణ చేయించింది. దీనిపై నివేదిక తయారు చేసిన ఎన్ఎండీసీ భూఉపరితలానికి దాదాపు 20 అడుగుల లోతులో సొరంగం ఉన్నట్లు నిర్ధారించింది. దీనికి సంబంధించిన నివేదికను ఇవాళ ప్రభుత్వానికి సమర్పించింది. ప్రస్తుతం పదోతరగతి పరీక్షలు జరుగుతుండడంతో.. వేసవి సెలవుల్లోనే తవ్వకాలు జరపాలని పురావస్తుశాఖ భావిస్తోంది.

Read more...

ఏం చేశారు గురూ...!

2012 సినిమా చూసినవారికి లేదంటే తెలుగు న్యూస్ ఛానెళ్లు పదేపదే చూసేవారికి యుగాంతం ఎంత భయంకరంగా ఉంటుందో కనిపించే ఉంటుంది. అది నిజమా.. అబద్దమా అన్న సంగతి పక్కన పెడితే, ఆకాశం నుంచి విరుచుకుపడుతున్న అగ్నిగోళాలు.. ఎగసిపడుతున్న సముద్రాలు, కుప్పకూలుతున్న భవనాలు... మాడి మసైన భూగోళం కనిపించే ఉంటాయి. అయితే..
హాలీవుడ్ సినిమా కావడంతో అంతా అమెరికా సీనరీలే కనిపిస్తాయి. ఎంతో ఖర్చుపెట్టి తీసిన ఈ గ్రాఫికల్ సీక్వెన్స్ కు లోకల్ టచ్ ఇచ్చారు హైదరాబాద్ అబ్బాయిలు. IACG కి చెందిన కొంతమంది ఓ అద్భుతమైన మల్టీమీడియా వీడియోను తమ క్రియేటివిటీతో సృష్టించారు. 2012లో యుగాంతం నిజంగా సంభవిస్తే హైదరాబాద్ ఎలా ఉంటుందన్నదే వీరి కాన్సెప్ట్. సెంటిమెంట్లు, ఫీలింగ్స్ పక్కన పెట్టి చూస్తే హాలీవుడ్ గ్రాఫిక్స్ ను తలదన్నేలా ఉంది మనవాళ్లు తయారు చేసిన వీడియో. ఇక్కడ రెండు వీడియోలను ఇస్తున్నాను. కాస్త తీరిక చేసుకుని చూసి.. మీకు ఏదినచ్చిందో చెప్పండి.
హైదరాబాద్ వీడియో


2012 మూవీ ట్రైలర్

Read more...