కాలి బూడిదైన చిన్నారి వైష్ణవి

విజయవాడ వైష్ణవి కేసు విషాదంగా ముగిసింది. ప్రాణాలతో బయటపడుతుందనుకున్న ఆ చిన్నారి.. కాలి బూడిదగా మిగిలింది. పోలీసుల వైఫల్యానికి నిదర్శనంగా వైష్ణవి విగతజీవిగా మారింది. పెద్దల వైఫల్యాలకు ఇలా చిన్నారులు బలికావాల్సిందేనా..
కిరాతకుల కర్కశత్వం మరోసారి బయటపడింది. ఆడుతూపాడుతూ గడపాల్సిన చిన్నారి వైష్ణవి కాలి బూడిదయ్యింది. మూడు రోజుల క్రితం స్కూల్‌కి వెళుతుండగా వైష్ణవిని కిడ్నాప్ చేసిన దుండగులు.. గుంటూరు వైపు తీసుకువెళ్లిపోయారు. ఎంతగా వెతికినా ఆచూకీ ఎంతమాత్రం తెలియలేదు. మూడు రోజులుగా ఈ కేసును సవాల్‌కు తీసుకొని దర్యాప్తు చేస్తున్న పోలీసులకు.. వైష్ణవి చనిపోయిందన్న విషయం ఆలస్యంగా తెలిసింది. ఈ వార్త తెలియడంతో వైష్ణవి తల్లిదండ్రులు ఒక్కసారిగా షాక్‌కు గురయ్యారు. గుండలలిసేలా విలపించారు.
బంధువులే హంతకులు?
వైష్ణవి తండ్రి ప్రభాకర్ మొదటిభార్య బంధువులే ఈ హత్య చేసినట్లు అనుమానిస్తున్నారు. పోలీసుల విచారణలోనూ.. ఆమె సమీప బంధువే.. వైష్ణవిని చంపేశామని అంగీకరించినట్లు సమాచారం. గుంటూరు సమీపంలోని ఆటోనగర్‌లో వైష్ణవి మృతదేహం లభించింది. ఆధారాలు దొరకకుండా చేసేందుకు.. ఇనుమును కాల్చే కొలిమిలో వైష్ణవిని కాల్చేశారు. ముట్టుకుంటే బూడిదయ్యే స్థితిలో వైష్ణవి డెడ్‌బాడీ ఉంది. కిరాయి హంతకులే ఈ పని చేసి ఉంటారని తెలుస్తోంది. పెద్దల మధ్య విభేదాలకు ఓ చిన్నారి బలి కావడం అందరినీ కలిచివేస్తోంది. ముక్కుపచ్చలారని ఆ చిన్నారిని అత్యంత కిరాతకంగా ప్రాణం తీయాలనిపించిన హంతకులను ఏం చేయాలి ?