4, ఫిబ్రవరి 2011, శుక్రవారం
కిల్లర్ వైరస్
వైరస్.. వైరస్.. వైరస్.. ఏ రోగానికైనా ఇప్పుడు వైద్యులు వేలెత్తి చూపిస్తోంది వైరస్నే. అవి సాధారణంగా వచ్చే జ్వరాలు కావచ్చు.. ప్రపంచాన్ని వణికించే ప్రాణాంతక వ్యాధులు కావచ్చు. మనిషిపై మహా దండయాత్రను మొదలుపెట్టింది వైరస్. కొన్నేళ్లుగా రకరకాల రూపాల్లో మనిషిని బలితీసుకొంటూనే ఉంది..
ఏప్రిల్.. 2009
ప్రపంచమంతా కలకలం చెలరేగింది. అంతుచిక్కని ఓ పేరు విని వణికిపోయింది. ఇక ప్రాణాలు పోవడమే.. అన్నంతగా భయం పుట్టింది. ఎవరిని కదిలించినా అదే భయం. అంతా అనుకున్నట్లే.. అత్యంత వేగంగా జనంపై అది దాడి చేసింది.. ఎంతోమందిని బలితీసుకుంది. ఆ మహమ్మారే... స్వైన్ఫ్లూ.
కంటికి కనిపించకుండానే స్వైన్ఫ్లూ జనంపై విరుచుకుపడింది. ఒక్కొక్కరిగా అంతం చేసింది. సైన్స్ ఎంతో అభివృద్ధి చెందిందని.. సమస్త జీవరాశిపై ఆధిపత్యం సాధించానని మనిషి విర్రవీగుతున్న సమయంలో.. స్వైర విహారం చేసింది స్వైన్ఫ్లూ. అధునాతన వైద్య సదుపాయాలు... మోస్ట్ పవర్ఫుల్ మెడిసిన్స్ అందుబాటులో ఉన్న ఈ కాలంలో... ప్రపంచవ్యాప్తంగా దాదాపు 20 వేల మందిని చంపేసింది. దానికి పట్టిన సమయం కేవలం ఒకే ఒక్క సంవత్సరం. దీన్ని బట్టి స్వైన్ఫ్లూ ఎంత ప్రమాదకరమో అర్థం చేసుకోవచ్చు. ఈ స్వైన్ ఫ్లూ స్వైర విహారానికి కారణం.. ఓ చిన్న వైరస్.
స్వైన్ఫ్లూ కాస్త జోరు తగ్గిందని అంతా సంతోషపడుతున్న సమయంలోనే మనదేశంలోకి కాంగో ఫీవర్ ఎంటరయ్యింది. స్వైన్ఫ్లూతో పోల్చితే నిదానంగా వ్యాపించే లక్షణం దీనికున్నా, అత్యంత వేగంగా ప్రాణాలు బలి తీసుకుంటుంది. గల్ఫ్ దేశాల నుంచి మనదేశంలోకి వచ్చిన ఈ వైరస్ను తలుచుకొని ఇప్పుడు గుజరాత్ వణుకుతోంది. దేశంలోని ఇతర ప్రాంతాలకు ఈ వైరెస్ వ్యాపించకుండా చూడడం ప్రభుత్వానికి శక్తికి మించిన పనిగా మారింది.
ఇవి రెండే కాదు.. ఎన్నో రకాల ప్రమాదకరవైరస్లు ఈ భూమిపై ఉన్నాయి. మనిషిపై విరుచుకుపడేందుకు అవకాశం కోసం ఆతృతగా ఎదురుచూస్తున్నాయి. మరి.. వీటిని ఎదుర్కోవడం ఎలా..? ఈ వైరస్లను తట్టుకొని నిలబడే శక్తి మనిషికి ఉందా..? ప్రాణాలపైకి వచ్చే వరకూ చూస్తూ ఉండాల్సిందేనా.. ? ముందుగానే వీటి ఆట కట్టించలేమా.? దీనికి ఇప్పటి శాస్త్ర ప్రపంచం సమాధానం చెప్పలేదు. ఎందుకంటే.. అసలీ ప్రపంచంలో ఎన్నిరకాల వైరస్లు ఉన్నాయో.. ఎక్కడెక్కడ ఉన్నాయో.. ఏలా ఉన్నాయో.. ఏం చేయబోతున్నాయో.. ఏ వ్యాధిని తేబోతున్నాయో... ఎవరికీ తెలియదు. మనిషిలోకి ప్రవేశించి.. మనిషిని నిర్జీవిగా మార్చే క్రమంలోనే ప్రమాదకర వైరస్ను గుర్తించగలిగే పరిజ్ఞానం మాత్రమే మనకుంది.
అందుకే.. స్వైన్ఫ్లూ, కాంగో ఫీవర్ లాంటి వ్యాధులకు మనిషి బలికావాల్సి వస్తోంది. ప్రాణాంతక వైరస్ల బారిన పడి ప్రాణాలు పోగొట్టుకోకుండదంటే.. అసలీ వైరస్లు ఎలా విస్తరిస్తున్నాయో తెలుసుకోవాలి. కొత్త కొత్త వైరస్లు ఎలా పుడుతున్నాయో అర్థం చేసుకోవాలి. అప్పుడే మీ ప్రాణాలను కాపాడుకోగలిగే శక్తి మీకు వస్తుంది. లేదంటే.. ఏదో ఓ కొత్త వైరస్ మీ అంతు చూడవచ్చు.
అంతుబట్టని వైరస్లు
స్వైన్ఫ్లూ ప్రకటన వెలువడిన కొన్ని గంటల్లోనే ప్రపంచ దేశాలు అప్రమత్తమయ్యాయి. ఎయిర్పోర్ట్ల్లో ప్రత్యేక ఏర్పాట్లు చేశాయి. విదేశాల నుంచి వచ్చే ప్రయాణీకులను క్షుణ్ణంగా పరిశీలించిన తర్వాతే అనుమతించడం మొదలుపెట్టాయి. కానీ, అప్పటికే ఆలస్యం అయిపోయింది. 21వ శతాబ్ధంలో అతి ప్రమాదకమైన స్వైన్ఫ్లూ అన్ని ఖండాలకు పాకిపోయింది. జనం గుండెల్లో రైళ్లు పరిగెత్తించింది. మాస్క్ పెట్టుకోకపోతే మరణమే అన్నంత భయం పెరిగిపోయింది. దాదాపు 12 కోట్లమంది చనిపోవచ్చంటూ పరిశోధకులు తొలుత అంచనా వేశారు. అయితే.. అనుకున్నం తీవ్ర రూపాన్ని దాల్చకుండానే శాంతించింది స్వైన్ఫ్లూకు కారణమైన H1N1 వైరస్..
ఈ చిన్న వైరస్లే మహామహాలైన శాస్త్రవేత్తలకూ అంతుపట్టడం లేదు. శాస్త్ర పరిశోధనలకే జీవితాలను అంకితం చేసేసినవారూ వీటిని పూర్తిగా అర్థం చేసుకోలేకపోతున్నారు. వైరస్ అతి సూక్ష్మంగా ఉంటుంది. సాధారణంగా జలుబును కలిగించే రైనో వైరస్ల తీసుకుని.. ఓ వరసలో నిలబెడితే... గుండుసూది తలపై పట్టడానికే యాభైవేల వైరస్లు కావాల్సి ఉంటుంది. దీన్నిబట్టి వైరస్ ఎంత చిన్నగా ఉంటుందో ఊహించుకోండి. వీటి నిర్మాణం కూడా రకరకాలుగా ఉంటుంది. కొన్ని సింపుల్ స్ట్రక్చర్తో ఉంటే మరికొన్నింటిది కాంప్లెక్స్ స్టక్చర్. ప్రోటీన్ కవచంతో ఇవి నిర్మితమవుతాయి. ఇవి బతకాలంటే జీవజాలంలోని కణాలు కావాలి. అది మనిషిదైనా, జంతువుదైనా, వృక్షాలదైనా సరే. అంటే వైరస్ పరాన్న జీవి అన్నమాట. అయితే.. వైరస్కు జీవం ఉంటుందా లేదా అన్నది ఇంతవరకూ తేలలేదు. సాధారణ వైరస్ నిర్జీవిగా ఉంటుంది. అది ఎప్పుడైతే కణంలోకి చొరబడుతుందో అప్పుడే తన ఉనికిని చాటుకోవడం మొదలుపెడుతుంది. యాక్టివ్గా మారిపోయి.. తాను చొరబడిన కణానికి నకళ్లను తయారు చేయడం మొదలుపెడుతుంది. తనలాంటి కొన్ని కోట్ల వైరస్లను తయారుచేయడానికి ఒక్క వైరెస్కు కేవలం ఆరుగంటల సమయం చాలు.
మన చుట్టూ ఉన్న గాలి, నీరు, భూమిలో ప్రతీదానిలోనూ వైరస్లు కోట్లాదిగా ఉన్నాయి. మనం శ్వాసతీసుకున్న ప్రతీసారి వేలాది వైరస్ను మన శరీరంలోకి వెళుతుంటాయి. అయితే.. అన్నీ మనిషికి హాని చేసేవి కాదు. సముద్రాన్నే తీసుకుంటే గ్లాస్ నీటిలో లక్ష రకాల వైరస్లు ఉంటాయన్నది అంచనా. ఇవన్నీ కూడా ఎకో సిస్టంను కాపాడడంలో కీలక పాత్ర పోషిస్తున్నాయి. సముద్రంలో జీవించే జంతుజాలంలో ప్రతీరోజు 20 శాతాన్ని ఈ వైరస్లు చంపేస్తుంటాయి. మనిషి పుట్టకముందు నుంచీ.. ఈ వైరస్లు భూమిపై ఉన్నాయి. అసలు వైరస్లు ఏమిటి? ఎలా పుట్టాయి.. ? ఎందుకు పుట్టాయన్నది అర్థం చేసుకోవాలంటే.. భూమి ఆవర్భించిన రోజులకు వెళ్లాల్సి ఉంటుంది.
భూమి ఆవిర్భావంతోనే
దాదాపు 350 కోట్ల సంవత్సరాలకు ముందు ఈ భూమిపై జీవసృష్టికి బీజం పడింది. ఆదికణం లుకా నుంచి ఈ సృష్టి మొదలయ్యింది. మొదట బ్యాక్టీరియా ఏర్పడింది. ఆ తర్వాత యుకేరియోట్ పుట్టింది. జీవానికి సంబంధించిన అన్నీ ఇక్కడినుంచే ఉద్భవించాయి. ఫంగి, మొక్కలు, జంతువులు, చివరకు మనుషులు దీన్నుంచే ఏర్పడ్డాయి. అయితే.. 1970లో సైటింస్టులు మరో కొత్త విషయాన్ని గుర్తించారు. దాన్ని ఆర్కేయాగా నామకరణం చేశారు. బాక్టీరియా కన్నా ఇది పురాతనమైందన్నది శాస్త్రవేత్తల అంచనా. ఈ ఆర్కేయాలోనూ వైరస్లు ఉన్నాయి. అంటే బ్యాక్టీరియాకన్నా ముందే వైరస్ పుట్టిందన్నమాట. వైరెస్లు పుట్టినప్పటినుంచి జీవజాలంలోకి ప్రవేశించడానికి నిరంతరం ప్రయత్నిస్తూనే ఉన్నాయి. చెప్పాలంటే భూమిపై ఉన్న జీవరాశిలో ఏది చనిపోవాలో.. ఏది జీవించాలో నిర్ణయిస్తోంది కూడా ఈ వైరస్లే. మొక్కలు, జంతువులు ఆవిర్భవించడంతో వాటిలోకీ వైరస్లు ప్రవేశించాయి. వాటికి తగ్గట్లుగా మారిపోయాయి. వాటితో పాటే ఒక ప్రాంతం నుంచి మరో ప్రాంతానికి విస్తరించాయి. ఇప్పుడు మనిషి అంతు చూసే దిశలో వేగంగా కదులుతున్నాయి.
తెలివైన వైరస్
ఒక మొక్కలోకి చేరిన వైరస్.. దాని ఆకులు, పళ్లు తినే పురుగుల ఒంటిలోకి చేరుతుంది. కానీ, దాన్ని ఏమీ చేయదు. అది తిరిగి మరో మొక్కపై వాలి అక్కడ తినడం మొదలుపెట్టగానే ఆ మొక్కలోకి వైరెస్ ప్రవేశిస్తోంది. వైరస్ వ్యాప్తిలో ఇదో మార్గం.
కొన్ని వైరస్లో జీవిలోకి చేరిన వెంటనే ప్రభావం చూపించడం మొదలుపెడతాయి. రేబిస్ వైరస్నే తీసుకుంటే.. అది కుక్కలోకి చేరిన వెంటనే దాని మెదడుపై ప్రభావం చూపించడం మొదలుపెడుతుంది. కోపాన్ని పెంచి కనపడినదాన్ని కరిచేలా చేస్తుంది. అలా మరో జీవిలోకి వైరస్ ప్రవేశిస్తుంది.
ఇక ఫ్లూ వైరస్లు వ్యాపించే విధానం మరోరకం. జలుబు వచ్చినా, ఫ్లూ జ్వరాలు సోకినా తుమ్ములు విపరీతంగా వస్తాయి. ఇది వైరస్ ఎఫెక్ట్. సార్క్, స్వైన్ఫ్లూ కేసుల్లో వైరస్ మన నాసికారంధ్రాల ద్వారా ఊపిరితిత్తుల్లోకి చేరుతుంది. అక్కడ క్రమంగా విస్తరించి ఎన్నోమార్పులను కలిగిస్తుంది. లంగ్స్లోని కణాలను చంపుతూ పోతుంది. మనకు వచ్చే తుమ్ముల రూపంలో తాను తయారు చేసిన వైరస్లను బయటకు పంపించి.. మరో మనిషిని అటాక్ చేస్తుంది.
ఒకప్పుడు వైరస్ ఓ చోట నుంచి మరో చోటికి వెళ్లడానికి చాలా కాలం పట్టేది. ఈ క్రమంలో ఆ వైరస్ ఎన్నో మార్పులకూ లోనై బలహీనపడిపోయేది. కానీ, ఇప్పుడు మాత్రం పుట్టిన కొన్ని గంటల్లోనే ప్రపంచమంతా విస్తరించగలుగుతోంది. మనం సాధించిన అభివృద్ధే దీనికి కారణం. విమానాలు, బస్సులు, రైళ్ల వంటి పబ్లిక్ ట్రాన్పోర్ట్ సిస్టమే వైరస్లు వేగంగా విస్తరించడానికి దోహదపడుతున్నాయి. ఇక రెస్టారెంట్లు,షాపింగ్మాల్స్, ఆఫీసులు కూడా వైరస్లు విస్తరించడంలో కీలకపాత్రను పోషిస్తున్నాయి.
ఓ మనిషి జీవిత కాలంలో దాదాపు 50 నుంచి 60 లక్షల వైరస్లు అటాక్ అవుతాయని అంచనా. ఇందులో ఒక్కోటి ఒక్కో తరహాలో మనిషిపై దాడి చేస్తుంది. ఎయిడ్స్కు కారణమైన హెచ్ఐవీ వైరస్నే తీసుకుంటే.. క్షణాల్లో తన రిప్లికాలను ప్రొడ్యూస్ చేస్తుంది. శరీరంలో వైరెస్లను గుర్తించి నాశనం చేసే ఇమ్యూనిటీ సిస్టంను డిస్ట్రాయ్ చేస్తుంది. అందుకే.. శాస్త్రవేత్తల దృష్టిలో ఇది వైరస్లకు రారాజు. మిగిలిన వైరస్లు కూడా ఇంతే .శరీరంలోకి చేరిన తర్వాత తమలాంటి వైరస్లను లక్షలాదిగా పుట్టిస్తాయి. వైరస్లతో శరీరాన్ని నింపేస్తాయి. మనిషి ప్రాణానికి ముప్పును తెస్తాయి. అంతేకాదు.. అతన్నుంచి మరోకొరి వ్యాపించి భీభత్సాన్ని సృష్టిస్తాయి.
వైరస్లను ఎదుర్కోగలమా?
మనిషి శరీరం ఎన్నో వైరస్లను నిత్యం ఎదుర్కోవాల్సి ఉంటుంది. వీటిలో చాలావాటిని మన శరీరం తట్టుకోగలుగుతుంది. వాటినుంచి కాపాడుకోవడానికి రక్షణవ్యవస్థను ఏర్పాటు చేసుకోగలుగుతుంది. అయితే.. శక్తివంతమైన వైరస్లు వచ్చినప్పుడు మాత్రం వాటిని మన శరీరం పూర్తిస్థాయిలో ఎదుర్కోలేదు. ఇలాంటి వాటిలో మొక్కలు, జంతువుల నుంచి వచ్చే వైరస్లే ఎక్కువ. హెచ్ఐవీ, హైపటైటిస్ బి, ఇన్ఫ్లుయెన్జాలు జంతువుల్లో వృద్ధి చెంది.. మనిషికి సోకినవే.
ఆఫ్రికాలోని కాంగో దేశం నుంచి ప్రపంచాన్ని నాశనం చేసే ఎన్నో వైరస్లు పుట్టుకొచ్చాయి. ఇప్పటికీ అక్కడ కొత్త కొత్త వైరస్లు పుడుతూనే ఉన్నాయి. హెచ్ఐవీ తొలిసారి గుర్తించింది ఇక్కడే. తాజాగా మంకీఫాక్స్ అనే కొత్త వ్యాధి ఇక్కడ విస్తరిస్తోంది. ఆటలమ్మ తరహాలో ఉండే వ్యాధి ఇది. అయితే.. జంతువుల్లోనే ఉన్న ఈ వైరస్ ఇప్పుడు మనుషులకు పాకింది. కోతులను వేటాడడం, వాటి మాంసాన్ని ఇక్కడివారు ఎక్కువగా తినడం వల్ల ఈ వైరస్ విస్తరించింది. ఇక్కడ జీవిస్తున్నవారిలో చాలామందిలో మంకీఫాక్స్ లక్షణాలను గుర్తించవచ్చు. క్రమంగా ఇది మనిషినుంచి మనిషికి పాకడం మొదలవుతుంది. ఈ వ్యాధి సోకిన వారిలో దాదాపు 10 శాతం మంది మృత్యు ఒడిలో చేరుతున్నారు.
కొత్త వైరెస్లు పుట్టకుండా చూడడం దాదాపు అసాధ్యమనే చెప్పొచ్చు. వాటిని ఎంత త్వరగా గుర్తించగలం అన్నదే దాని ప్రభావాన్ని తగ్గించడానికి ఉపయోగపడుతుంది. చెప్పాలంటే హెచ్ఐవీ తొలికేసు 1958లోనే కాంగోలో మొదలయ్యింది. కానీ, 1980ల వరకూ హెచ్ఐవీ వైరస్ను పరిశోధకులు గుర్తించలేదు. క్రమంగా ఈ వైరస్ ప్రపంచవ్యాప్తంగా విస్తరించింది. ఇప్పటివరకూ కొన్ని కోట్లమందిని బలితీసుకొంది. ఇంకా తీసుకుంటూనే ఉంది. ప్రపంచదేశాలు ముందు జాగ్రత్తలు తీసుకొని సేఫ్సెక్స్ను ప్రచారం చేయడంతో హెచ్ఐవీ మరణాల తీవ్రత తగ్గుముఖం పట్టింది. కానీ హెచ్ఐవీని మాత్రం పూర్తిగా నిర్మూలించలేకపోయారు. అంతటి ప్రమాదకర వైరస్ అది.
అయితే.. కొన్ని ప్రమాదకరవైరస్లను మాత్రం భూమిపై లేకుండా చేయడంలో మన శాస్త్రవేత్తలు విజయం సాధించారు. అందులో ముందుగా చెప్పుకోవాల్సింది స్మాల్ఫాక్స్. శరీరమంతా పొక్కులు వచ్చి, మనిషిని బలహీనపరిచి ప్రాణం తీసే మాయదారి రోగమది. కొన్ని దశాబ్దాల క్రితం ప్రపంచాన్ని కలవరపెట్టిన అతిపెద్ద సమస్య. పసివాళ్ల నుంచి పెద్దల దాకా ఎంతోమంది స్మాల్ఫాక్స్కు బలయ్యారు. ఇది సోకిన ప్రతీ ముగ్గురులో ఒకరు ప్రాణం కోల్పోయారు. ప్రపంచ ఆరోగ్య సంస్థ దీనిపై ప్రత్యేకంగా దృష్టి పెట్టి వ్యాక్సిన్ను అందరికీ అందుబాటులోకి తేవడంతో పరిస్థితి మారింది. కొన్ని కోట్ల డోసులు ఇచ్చి మశూచిని మాయం చేయగలిగారు.
ఇప్పటికీ స్మాల్ఫాక్స్ వర్గానికే చెందిన చికెన్ఫాక్స్ సోకుతున్నా అది మశూచి అంత ప్రమాదకారి కాదు. ఇక మరో వైరస్.. పోలియో. దీన్ని కూడా చాలావరకూ నిర్మూలించగలిగారు. ఒకప్పటితో పోల్చితే పోలియో బారిన పడుతున్నవారి సంఖ్య ఇప్పుడు చాలా తక్కువ. పోలియో డ్రాప్స్ క్రమం తప్పకుండా వేస్తుండడంతో వైరస్ అంతరించిపోతోంది. మరికొన్ని సంవత్సరాల్లోనే ఇది కూడా మశూచిలా మాయం కావచ్చు.
వైరస్ను అంతం చేయలేమా?
స్మాల్పాక్స్ లాంటి ప్రమాదకర వైరస్ను అంతం చేయగలిగిన మనిషి... హెచ్ఐవీను ఎందుకు నిర్మూలించలేకపోతున్నాడు..? కొత్త కొత్త వైరస్లు పుట్టకుండా ఎందుకు ఆపలేకపోతున్నాడు..? ఈ ప్రశ్నలకు వచ్చే సమాధానాలు మనకు కాస్త కలవరాన్ని కలిగించవచ్చు.
స్మాల్ఫాక్స్ వైరస్ ను అరికట్టడంలో వ్యాక్సిన్ పాత్ర కీలకం. ఆ వైరస్ అంతర్గత నిర్మాణం ఆధారంగా ఈ వ్యాక్సిన్ తయారయ్యింది. కానీ, హెచ్ఐవీ సహా ఇతర వైరెస్లు స్మాల్ఫాక్స్ అంత మంచివి కాదు. అవి అవసరాన్ని బట్టి, సమయాన్ని బట్టి తమ రూపాన్ని అతి వేగంగా మార్చేసుకుంటున్నాయి. దశాబ్దాలుగా మనిషికి సవాల్గా మారిన హెచ్ఐవీ వైరస్నే తీసుకుందాం. శరీరంలోకి ప్రవేశించిన తర్వాత తన సంఖ్యను వేగంగా పెంచుకుంటుంది. ఇవన్నీ తొలి వైరస్ కణానికి నకళ్లే అయినా అంతర్గత నిర్మాణం మాత్రం మారిపోతుంది. హెచ్ఐవీ జీన్స్ను ఇంగ్లీష్ లెటర్స్ ద్వారా సూచిస్తారు. కోట్లాదిగా ఉంటే హెచ్ఐవీ వైరస్లో ఈ కోడ్ ఒకదానితో ఒకటి పోలిక ఉండదు. ప్రతీ వైరస్ కణంలో కొన్ని అక్షరాలు మారిపోతాయి.
ఒక కోడ్కు అనుగుణంగా వ్యాక్సిన్ తయారు చేస్తే ... అది మిగిలిన కోడ్స్ పై పనిచేయదు. అందుకే, హెచ్ఐవీకి ఇంతవరకూ వ్యాక్సిన్ తయారు చేయలేకపోయారు. పైగా, ఈ వ్యాక్సిన్లను తట్టుకొని మరింత శక్తిమంతంగా ఈ వైరస్ మారిపోయే ప్రమాదమూ ఉంది. ఇక మిగిలింది.. శరీరంలో రోగ నిరోధక శక్తిని పెంచుకోవడమే. అందుకే, ఎయిడ్స్నుంచి తట్టుకోవడానికి యాంటీ రిట్రోవల్ డ్రగ్స్ను వాడాల్సి వస్తోంది.
ఇక ఇప్పటికే ఉన్న వైరస్లు కొత్త వైరెస్ల సృష్టికి కారణం అవుతున్నాయి. ముఖ్యంగా జంతువుల్లోనే ఈ కొత్త వైరస్ల సృష్టి ఎక్కువగా జరుగుతోంది. రెండు మూడు రకాల వైరెస్లు ఒకేసారి జంతువుకు సోకినప్పుడు.. ఆ రెండు వైరస్లు కలిసి కొత్త వైరెస్ను సృష్టిస్తున్నాయి. స్వైన్ఫ్లూ కు కారణమైన H1N1 వైరస్ ఇలానే పుట్టింది. సాధారణ ఫ్లూను కలిగించే వైరస్ ప్రాణాంతక వైరెస్గా మారిపోయింది. మనిషి జననం ఎలా జరుగుతుందో.. కొత్త వైరస్ల పుట్టుకా అలానే జరుగుతుంది. భార్యాభర్తల్లోని రెండు జతల క్రోమోజోములు కలిసి కొత్త ప్రాణాని సృష్టించినట్లే.. రెండు వైరస్లు కలిసి.. మరో కొత్త వైరస్ను తయారు చేస్తున్నాయి. మనుషులు, జంతువులు, పక్షులు వీటిల్లో ఉన్న వైరస్లు.. జీన్స్ మార్పిడి మరింత శక్తివంతమైన వైరస్లుగా రూపాంతరం చెందుతున్నాయి. మానవాళికి సవాలుగా మారుతున్నాయి.అందుకే.. ఇప్పుడు సైంటిస్టులు ఆలోచిస్తోంది ఒక్కదాని గురించే.. ఈ వైరస్లను ఎలా కట్టడి చేయాలని కాదు.. నెక్స్ట్ వచ్చే వైరస్ ఏమిటనే? నిజమే.. కొత్తగా పుట్టుకొచ్చే వైరస్ను తట్టుకోవడానికి మనం సిద్ధంగా ఉన్నామా...? మన ప్రాణాలకు గ్యారెంటీ ఉందా..? ప్రస్తుతానికి దీనికి సమాధానం తెలుసుకోవడం కష్టమే..
దీనికి సబ్స్క్రయిబ్ చేయి:
కామెంట్లను పోస్ట్ చేయి (Atom)
use full post ..thank you